En el espasyo de unas kuantas semanas, tres İnstitusyones djudias fueron inoguradas en diferentes payizes, afirmando ( una vez mas) la prezensya i el dinamizmo de muestro puevlo, un poko en kada lugar del mundo..
El 28 del mez de djulyo 2013 : Fruto de una kolavorasyon entre la Organizasyon ‘Shavei Israel’ de Yerushalayim i la Munisipalidad de Transcoso en el Portugal, un muevo sentro relijyozo i kultural djudyo avyo sus puertas en esta sivdad . El es el primer inogurado en este lugar desde la epoka maldicha de la İnkizisyon .
Mas de 100 personas partisiparon a la seremonia de inogurasyon i un Sefer Torah fue traido de Isreael. ‚
’’Es un momento historiko (disho el fundador Michael Freund, prezidente de Shavei Israel )Este muevo Sentro va komemorar los multiples djudyos portugezos ke fueron, 5 siglos antes, persekutidos o konvertidos de fuersa; esta seremonia simboliza el Renasimyento Djudyo’’.
Pokos dias mas tadre, el 31 Djulyo 2013 : Shimon Perez, prezidente del Estado de Israel, partisipo a la Avyertura del ‘Lipke Memorial Museum’ en Riga (Letonia), erijido en honor de un ombre nombrado Zanis Lipke i de su mujer Johana, los kualos durante la segunda gerra mundyal, dyeron avrigo a 50 djudyos en una foya (de 90 metros kuadrados) kavakada kaji debasho sus propya morada, afin de salvarlos de una muerte segura.
El Lipke Memorial Museum tyene la forma de una embarkasyon aboltada, echa de tavla oskura, para evokar en el esprito de los vijitadores, el sentimyento de klostrofobia ke devia ser el de los desmazalados fujitivos.
El Prezidente del Estado Hebreo tuvo el honor de kortar en djunto kon el Prezidente de Letonia ‘Andris Berzins’ la kordela de entrada. En su diskorso, Shimon Peres evoko la manera kon lakuala los imigrantes de Letonia fueron resividos en tyerras djudias i los altos postos de influensa a los kualos eyos alkansaron, enrikesyendo ansi el desvelopamyento de Israel.
A notar ke durante la maldicha segunda gerra mundyal, la Letonia tuvo a enfrentar multiples insidentes tal ‘el masakro Rumbula ke izo 25.000 muertos.
En el anyo 1996, Zanis et Johana Lipke fueron rekonosidos i klasados entre ‘’los Djustos’’ de parte de Yad Vashem.
Vinyendo al treser avento pozitivo de la diaspora djudia , puedemos mensyonar ‘la inogurasyon del ‘primer muzeo djudyo en Alaska’ kon la kontribusyon governomental de este estado .
En el anyo 2007, Rav Yosef Greenberg i su mujer Esty demandaron el ayudo de los filantropos de Chikago ‘Morris i Delicia Esformes’ para rekojer donasyones. Segun un raporto a este sujeto, los donos de la komunidad djudia de Alaska totalizaron 4 milyones de dollares kon los kualos se pudo merkar un edefisyo ande instalar un sentro kultural i un muzeo.
La ekspozisyon organizada para el dia de la inogurasyon, fue nombrada ‘Sovre alas de agila’ i tenia komo tema prinsipal ‘ el rolo de los pilotes de Alaska Airlines’ durante la operasyon Magic Carpet ande 49.000 djudyos del Yemen fueron transportados en Israel.
‘ Muzeos’ o ‘ Sentros kulturales’ erijidos al nombre de una persona o byen de un akontesimyento son todos los dos komo la memorya de lo ke bivyeron i izyeron munchos de muestros antepasados, de sus aktos i de sus sonyos munchas vezes kruelmente interrumpidos.
