El 7 del Agosto koryente era “Rosh Hodesh”. Entonses entrimos al mez de Elul ke tyene la partikolaridad de ser el ultimo mez del kalendaryo ebraiko. Estamos vyendo semana por semana, los “Diyas Temerozos” aserkarsen...Diyas yamados “Yamim Noraim”, konsiderados komo una peryoda de djuzgamyento, arrepentimyento o regretos... Elul es dicho ser el “Mez de oportunidad”, deke?...Vamos a ver...
El orijen de esta peryoda ampeso durante el “Egzodyo” de los Djudios salvando del esklavaje de Ejipto. Vinyeron al Monte Sinay para resivir la “TORA”. Malorozamente, en el 16 de Tamuz, kometyeron el grande pekado de la “Vakita de Oro”. Moshe Rabenu, abashando del Monte kon las primeras Tavlas de los “10 Komandamyentos” vido los Djudios en idolatriya. A la vista de este renyegamyento, de blasfemo, “se ensanyo”, echo las “Tavlas” de pyedra i las rompyo. Era el 17 de Tamuz. Es el diya del taanit “Shiva asar be Tamuz”.
En el primo de Elul, Moshe Rabenu fue “Ordenado” de suvir al Monte Sinay para resivir las sigundas “Tavlas de la Ley.” En el 10 de Tishri abasho kon el sigundo set de los “10 Komandamyentos.” Esto era la sinyifikasyon del pardon “Selesto” verso su puevlo. Este diya de 10 Tishri fue dezinyado komo “Yom Kipur”, diya de grande pardon. Desde akel tyempo, los diyas entre 1 Elul- 10 Tishri fueron una peryoda espesyal, de egzamen de konsensya, de pedronansa. Elul es konosido komo mez de piadad: “Hodesh Harahamim”...En Elul, el Shofar de las orasyones de demanyana mos aze akodrar ke Rosh Ashana i Yom Kipur estan serka.
Keridos amigos, de vez en kuando, en mis artikolos tengo apuntado la importansa de inkulkar a muestros chikos los preseptos, las nosyones del Djudaismo. Syempre tuve la konviksyon ke esto es una garansiya (minima o no) para muestro futuro. El esensyal es de konoser, akodrar de muestras orijines, de muestro pasado. No pyedrer el atamiento a muestras Mitzvot, muestra Kultura etys.. Un puevlo ke no konose su pasado o se alesha de el, tiene tambien un futuro indeterminado.
En el presipyo del anyo pasado, en estas fyestas, izimos la promesa de amijorearmos. En ke grado reushimos? Es ke por una razon o otra, mankimos a muestra palavra? Malgrado todo, si izimos yerros, faltas, o puede ser mizmo pekimos, El Todo Poderozo mos pedronara si muestro arrepenyimyento es sinsero. Desde el “Rosh Hodesh” de Elul, el Djudio se apareja ( o deve aparejarse??) a un analiz i refleksyon personal, kon sinseridad. Deve azer su oto-kritika, bushkando remedyos de adovar (si se puede dezir ansi) sus faltas o yerros. En una manera, es komo revizar su kondokta myentres el anyo i azer un “Bilanso” moral.
Meldi en un teksto ke los Raves mos tienen dicho Elul syendo el “Akronimo” de “Ani le Dodi, V’Dodi Li”, una fraza de la “ Kantika de las Kantikas”. Es tyempos de aboltarmos kon Amor, verso D. i resivir en retorno su “Amor”.
Antes de meter el punto final, aki kero relatar un paragrafo ke tengo tomado de un artikolo eskrito por el Gran Rabbino Moshe Levy: “Los diyas redutavles (Yamim Noraim) konosyeron grande alegriya i momentos de grande entuzyazmo. Fue en Rosh HaShana ke tuvo lugar el estrenamiento del “Templo de Yerushalayim” por Shelomo Ha Meleh”… Keridos lektores, me esto rendyendo kuento ke mi teksto fue un poko mas diferente. de uzo. Deve ser unikamente achakes la “Solemnidad” del sujeto, i de las fyestas ke estan aserkando. Eskaparemos en repetando: “Elul es la oprtunidad del anyo...”
(*)-“Acronyme” es un byervo formado kon las primeras letras de una fraza.
