İmpedir el mundo dezazerse

Myerkoles la noche de la semana ke vyene: “Primeras oras de Rosh a Shana”, momentos ke desde los leshanos tyempos de mi chikes eran para mi yenos de una esperansa syempre empapada de anksyedad...Kon o sin konviksyon, todos en la kaza de mis avuelos ande me engrandesi, ekspresavamos  los mizmos dezeos kaji kon las mizmas palavras: “eskritos en livros de vida i de alegria”, “anyada buena”, “pujados i no amenguados”, ”para kada anyo mijoreado”, “paz i amor en los korasones i entre los governos” ets.... ets...

Oy, en el anyo 2013, ke dezeos pronunsyar ke no tendran un sonido falso o una absensya total de konviksyon? El kaos  en muestro entorno se esta azyendo de mas a mas impenetravle i la verdad esta kaji syempre mesklada a la mentira, komo las dos fachas de una mizma koza.

En el Oriente Medyo, la situasyon  devyene gradualmente mas obskura de dia en dia, sovre todo en la ‘Siriya’; lo ke (al pareser) nesesita la intervensyon de un Organizmo de Valor Universal  para re-estableser el orden i la djustisya. Ma amenazas de mas a mas virulentes estan metyendo los ke puedran azerlo en estado de ezitasyon...El puevlo Siryano esta sufriendo desde mas de dos anyos, ninyos estan muryendo por nada, ma las alegasyones (djustas o falsas) ke los gazes kimikos fueron utilizados  no de parte de la armada, ma departe de los revolusyonaryos eyos mizmos, renden ainda mas difisil la desizyon de una intervensyon estranjera...

No intervenir (si realmente los atakes kimikos son la ovra de la armada governomental)  es un krimen kontra la humanidad. İntervenir (si los kulpantes son los revolusyonaryos eyos mizmos) es un krimen politiko ke puede provokar dezastres inkonmensuravles.

Tenia razon Albert Camus kuando ay de esto 56  anyos, en su diskorso de  agradesimyento el dia ande el premyo Nobel de literatura le fue atribuido en el anyo 1957, el avia dicho: “Chaque génération, sans doute, se croit vouée à refaire le monde. La mienne sait pourtant qu’elle ne le refera pas. Mais sa tâche est peut-être plus grande. Elle consiste à empêcher que le monde se défasse.” (Al pareser, kada jenerasyon kree sin dubyo ke es destinada  a re-azer el mundo. La  muestra  portanto save ke eya no puedra nunka re-azerlo; su dover es byen mas grande, el konsiste a  impedir el mundo de dezazerse).

Es ke muestra jenerasyon  puedra realmente impedir kel mundo se dezazga?  Kestyon a la kuala es muy difisil de responder. Oy mos demandamos lo ke sera la reaksyon de las grandes potensyas delantre la desgrasya del  puevlo  Siryano i del  Ejipsyano, los kualos en este momento riskan de ser despedasados en sus omojeneidad?

Todo esta tanto embrolyado, ke, de espanto de provokar dezastres ainda mas grandes, ninguno tyene el koraje impulsivo de intervenir, de azer un kualkyer djesto o pronunsyar una kualkyer palavra.

56 anyos pasaron del dia ande Albert Camus avia pronunsyado el presitado diskorso de agradesimyento en Sued… Es ke la situasyon troko realmente? Eske despues del desgrasyado  karnaje de la segunda gerra mundyal , no uvo i no ay aktualmente otros karnajes? Es ke la rasa humana puedra realmente tomar konsyensya de la responsabilidad  ke inkumbe a kada  kriansa pensante, ken ke sea, de luchar para ke ‘la akseptasyon mutual’ remplase ‘el odyo i el aborresimyento del otro’?

Malorozamente  en el korason de munchas personas, persiste  esta  terrivle konviksyon ke solamente lo ke eyas pensan es djusto...No mos olvidaremos ke este  orgolyo  absurdo puede ir  envezes asta el  fanatizmo...

Kualo ke se diga, kualo ke se aga, en el esprito de munchos ombres i mujeres, ay syempre el mizmo radikalizmo, komo si  para eyos egzisten dos solas alternativas, la una pozitiva  i la otra absolutamente negativa, un djenero de manikeizmo destruktor ke parese venir del obskurantizmo de los tyempos primaryos, al kual  se enganchavan  puede ser muestros muy leshanos avuelos.

Es ke esta vez, en el kaos de una partida del Oriente Medyo, un milagro puedra impedir el dezastre de ver la rasa humana pedrer su humanismo?