“Tahel Şana Uvirhotea”
Keridos Korelijionarios,
Komo ya lo savesh muy bien; kada empesijo nuevo de periodo del tiempo ke sigue a ser un konsepto perpetual, es tambien una okazion eksepsionala de dirijir a nuestro kriador nuestros dezeos, nuestras esperansas i nuestros suhetos.
En estos dias ke estamos a la entrada de un anyo nuevo, me gutsaria de empesar a este mesaje en aderesandovos la bendision apropriada a estos dias:
“Empese la aniada kon su fertilidades”
Sigun las reglas de nuestra santa relijion Rosh Ashana no solo ke es un empesijo del periodo del kalandario, sino ke es una oportunidad de kontrolar nuestra kondukta en realizando un egzamen de konsensia i de arreglar nuestra vida konforme a los preseptos de nuestra santa Tora.
El mes de Tishri es un periodo yeno de espritualizmo i orasion ke nos da esta okazion kon “Rosh Ashana”, “Yom Kipur” i las fiastas de “Sukot”, “Şemini Atseret” i ”Simhat Tora”.
“Ayom Arat Olam, Ayom Yaamid Bamişpat”
“Es diya ke se manifesto el universo, Es diya de estar en djuzgo”
Klaro ke ya estamos bien prontos a esta atmosfera dizde un mes kon las orasiones de “Selihot”, no tengo dubyo ke nuestros ermanos van valorizar esta oportunidad para kompletar los preseptos de nuestra santa ley komo siempre.
Keridos Ermanos.
Este anyo sinyifika tambien un periodo de rekuperasion jeneral en nuestra komunidad en todo modo de senso.
Siendo una komunidad ke se esta amenguando i se esta envejesiendo komo populasion tenemos ke dirijir nuestras fondasiones i institusiones en lo mas posivle rasyonalizmo.
Me siento el dover de apoyar kom mis bendisiones a el Prezidente de nuestra komunidad cuntos nuestros konsejeros ke verdadmente se estan esforsando kon abnegasion en este asunto i dezeo ke todos nuestros ermanos se adjunten kon eyos moralmente i materialmente.
Todo en aviendo entre nuestros korelijionarios:
“Ahava Veahva, Shalom Vereut/Amor i ermandad, pas i Amistad”
No deve de aver ningun dubyo ke puedemos defender i enforteser nuestra egzistensia.
El empesijo de un nuevo anyo es tambien la okazion de aderesar nuestras orasiones a el Santo i Bendicho El ke nos regale un mundo yeno de pas entre nozotros, de artura a los ambrientos i de abrigo a los desnudos.
Siendo yeno de estos pensamientos i sentimientos suheto ke seamos meresientes de la mizerikordia del bendicho kriador i ke alkansaremos a munchos anyos kon todos nuestros keridos i serkanos kon sanedad, prosperidad i alegria.
Kon todas las bendisiones da la Santa Tora.
Tizku Leşanim Rabot
Şana Tova Umeuşeret.
Rav İsak HALEVA
Gran Rabino
