Komo, myentres la Inkizisyon, el SHOFAR fue chuflado publikamente?
Bien entendido, se trata del suplemento de mi teksto de “El Amaneser” No.103.El lektor va topar la primera partida de esta estorya en la 6. pajina de muestra revista, titolada komo “ Ampesando a la Anyada Mueva”. Dunke, otros detalyos konsernando el insidente, fueron adjustados en un diferente artikolo del mizmo jurnal. Asigun este artikolo, al pareser, el Kondoktor de la Orkestra Real de Barselona, era Don Fernando Aguilar, konvertido al Kristianismo myentres la Inkizisyon. Un Marrano ke, debasho la aparensya de un orgolyozo espanyol katoliko, era un fervente djudio sekreto.
Kontinuando asigun el artikolo, estamos meldando ke la Eglisya supsonandose del Sr. Aguilar, en el Rosh Ha Shana del anyo 1497, dechido de organizar un Konsierto de Gala. Esto era espesyalmente, para provar el Shefe de la Orkestra, para azerle pasar komo un “test”. Alora, Don Fernando penso de azer el mas espektakular konsierto visto i sintido en Barselona asta akel diya.
La “ekstravagansa” del Shefe Aguilar, iva inkluir kada uno i uno de los istrumentos muzikal konosidos en la istorya i otros.. Este Konsierto deviya ser “Una Sublima Kaskada de Delisya Muzikal dedikada a la Glorya de la Eglisya”. Los rikos famozos de Espanya asistyeron a este evento uniko, ansi ke la Reyna Isabel.
Egzaktamente komo se deviya asperar, el Konsierto fue una “Ovra Maestra” de arranjamiento muzikal kon la introduksyon de “Etranyos Kuernos” , nunka vistos mas antes en un salon de Konsierto de Espanya. Kon la instigasyon de Aguilar, los muzisyanos produizyeron kon las notas una grande eksitasyon… Una syentena de notas djugadas en perfekto akordo i finalmente, kon la ultima nota ke paresiya kontinuar asta la Eternidad…La odiensa estava komo “loka”…
Este fue el ultimo konsierto de Aguilar en Barselona. En el artikolo no ay una presizyon konsernando la fin de Don Fernando Aguilar. Unos dizen ke, despues del trionfo del Konsierto, se retiro a su sivdad natal. Ay otras rumores sovre los dubyos de la Eglisya, al sujeto de la relijyon de Aguilar ke ansi fue “egzekutido” en silensyo. Una versiyon de esta estorya fue eskrita para los chikos por Jacqueline Dember Greene kon el titolo “The Secret Shofar of Barcelona” antes unos, kuantos anyos…
Por siguro, los lektores del “Şalom” ya meldarian el artikolo de muestra amiga Karen Şarhon, konsernando “La Universidad d’Enverano del Judeo-Espanyol” en Paris”. Fue la “Asosyasyon Aki Estamos kon la kolaborasyon de l’Alliance Israelite Universelle” ke organizaron esta aktividad kultural, entre el 7-12 de Julio. La Asosyasyon Aki Estamos, tambien edita la revista trimestrial “Kaminando i Avlando”.
En la rubrika “Ke haber del mundo?” (redijida en fransez) del No. 3 de la revista aviya meldado: “El 22 Novembre 2012 en Madrid, los Ministros del Derecho i del Eksteryor prezentaron una instruksyon a la “Casa Sefarad Israel”, dizyendo: “Todo Djudio desendiente de los sefaradis ekspulsados de la Espanya, va pueder obtenir la Nasyonalidad Espanyola, en azyendo konoser su kondisyon kon su nombre, lingua i jenealojiya, sus atajidos kon la Kultura Espanyola ets.”.
La sigunda rubrika, la del No.5 de “Kaminando i Avlando”, (Septembre 2013) tiene komo titolo “Nasyonalidad Portugeza para los sefaradis” i meldamos: “Un artikolo del jurnal espanyol “El Pais” datado del 30 Mayo 2013, indika ke en el Parlamento Portugezo resientemente se acheto de akordar Nasyonalidad Portugeza a los desendientes de los sefaradis portugezos.Komo se save, verso la fin del 2012 una desizyon identika se aviya tomado en la Espanya. Ma, no es siguro si oy en diya es “elijivle”i ke manera esta desizyon sera aplikada”.
El “Haber” esta kontinuando ansi: “En el forum ladinokomunita del 31 Mayo, muestra amiga Rachel Amado Bortnick dando esta enformasyon,esta adjustando ke no ay dinguna urjensya de aparejar muestras validjas!!”..Keridos lektores, mi solo komentaryo es este punto d’eksklamasyon.
Akeyos mizmos diyas, en el “Şalom” tambien meldi kon atansyon novelas sovre este sujeto. Antes unos, kuantos anyos me enteresi bastante al sujeto de “Ekspulsyon” seya de Espanya, seya del Portugal i me rendi kuento ke, sovre la Ekspulsyon de Portugal se avlo i se eskrivyo muncho mas poko ke la de Espanya. Alora ize bushkidades, meldi dokumentos, de kualos penso azer un “kolaj” i publikarlos en el proksimo No. de “El Amaneser”.
SHANA TOVA-HAG SAMEAH.
