Dias amargos de ezitasyon

Fueron i son ainda difisiles a akseptar los eventos de estos ultimos dias del anyo djudyo 5773.... dias de dolyo  a la sigida del karnaje en Siriya; viktimas por la mas parte   ‘mujeres’ i ‘ninyos inosentes’ ...  dias tambyen  de anksyedad i  de ezitasyon para una grande parte del mundo  Oriental komo Oksidental, kada uno  konsyente de la terrivle trajedia ke se djugo el 21 del mez de Agosto, serka o leshos de eyos, sin saver egzaktamente ke desizyon  tomar.

Si....Dias de insertidumbre i de indesizyon... Oy la kestyon para munchas grandes potensyas demokratikas, es :Ke kamino sigir? 

a)Kedar sin intervenir debasho el  preteksto del vyejo prinsipyo de ‘no injerensya’, el kual (en el pasado) pretendia  ke kada puevlo era otonomo, libre i solo responsavle de sus aktos al interyor de sus propyas frontyeras?

b))O byen ‘al nombre  del aktual  dover de ayudo mutual ke egzije el konsepto de la sovreguardya de todo lo ke es humano’, ripostar publikamente de una manera al prinsipyo politika ma a la sigida (en kavzo de persistensya de kualkyer krimen)  militarmente, lo ke puedeser sera un grave reziko ke no se puede enteramente evaluar de antes?

Es verdad ke no se pueda nyegar el reziko ke kontyene  kualkyer intervensyon, la kuala en syertos kavzos puede mizmo agravar ainda mas el estado de lo ke eya kere amijorear; ma de otra parte, el mundo sivilizado no puede kedar indiferente ni kayado delantre los chikos puerpos de ninyos ke vimos en los ekranes de la televizyon, alineados en sus mortajas.

Feridos en sus konsyensya komo tambyen en sus sensivilidad, los Estados Unidos komo tambyen  syertos otros payizes Muzulmanos komo Kristyanos se topan delantre un kruel  dilema ...Por las oras asta prezentasyon  del raporto ofisial de los ekspertos de la ONU  kargados de analizar el kavzo en el lugar mizmo ande se produzyo, ninguna prova  juridikamente  valivle no sertifika de una manera  absoluta la sola responsavilidad del governo Siryano... ‘La hipotezis kontrarya tal ke fue anunsyada por las otoridades governomentales del payis  i sus amigos la Rusia i el İran’ es en realidad a penas kredivle, ma malorozamente tyene en todo kavzo  su problematiko pezgo juridiko..

Komo munchos komentadores lo dizen “ deshar sin kastigo un semejante krimen  sera interpretado komo un akto de frajilidad o de kaji indiferensya jeneral i ansi puedra avrir la puerta a muevos aktos kriminales ainda mas graves...Es del raiz ke kale arrankar el instinkto de  krueldad.

De otra parte, munchos de muestros lektores se akodraran por seguro la remarka  ke Jacques Chirac entonses prezidente de la Republika Franseza avia echo a Georges Bush antes ke las armadas amerikanas, ay de esto mas o menos 10 anyos, ataken el Irak: “Vuestra intervensyon riska de avrir la kashika de Pendor”.

İ komo en akel tyempo, el mundo formula oy la mizma kestyon: ‘İntervenir o no intervenir’? kestyon ke persige de una manera obsesyonal i muy doloroza la konsyensya de los dirijentes de varyos payizes realmente sivilizados.

Tal  ke fue eskrito en esta mizma pajina la semana pasada: “No intervenir en Siriya (si realmente los atakes kimikos son la ovra de la armada governomental)  es un krimen kontra la humanidad”. “İntervenir (si los kulpantes son – uno sovre mil-  los revolusyonaryos eyos mizmos) puedra ser un krimen politiko ke provokara dezastres inkonmensuravles.”

Esto dicho, es util de anotar ke  las primeras amenazas del İran (en kavzo de intervensyon Amerikana) fueron ke İsrael sera immedyatamente atakado . Las autoridades Ebreas todo en guadrando relativamente el silensyo, empesaron a  planifyar a la kayades sus sistema de defensa...maskes kontra  gazes toksikos fueron distribuidos a todos los sitizanos  i aparatos para defendersen kontra kualkyer misil enemigo  fueron instalados.

De Otra parte la Kina i la Rusia avizaron los Estados Unidos ke kualkyer atako kontra el Iran de parte del Estado Ebreo provokara una gerra mundyal internasyonal.

El Dyo ke proteje Israel i el mundo entero!