Shabat ke vyene, el 14 del mez koryente vamos a kumplir ‘Kipur’ ....dia de solemnidad entre todos, ke mizmo los no-kreentes munchas vezes observan... Dia ande el ombre syente ke se topa delantre Dyo para dar kuento de sus aktos i implorar su perdonansa, lo ke para kada uno de entre mozotros tyene una sinyifikasyon espesyal.
Mas de vente i sesh oras de ayuno i de devosyon sinsera en direksyon del “Bendicho sea su Nombre” ande kada djudyo bive la dinyidad de ser una kriansa pensante, konsyente de su dover de humano.
No es kon el sonido del Shofar ke toma fin el dia de kipur, el se kumple realmente en sigida, kon el esforso dia despues dia de realizar las promesas echas en las oras de implorasyon, tal un engajamyento sakro ke tomamos delantre muestra konsyensya.
Komo mos rekomendan los Livros Santos, Kipur deve ser un dia de Teshuva, de retorno a si... de arrepentimyento i de bushkida de repuesta...
Ke puede ser la repuesta a muestro arrepentimyento, si no “la Tsedaka” en el senso real de la palavra.
Tsedaka no es (tal ke munchos lo pensan) “limosna” 10 o 100 liras dadas a un menesterozo, Tsedaka en su verdadero senso sinyifika “djustisya”, i es en este senso ke devemos entenderlo en muestro pensamyento, muestros aktos i muestras palavras.
No mos olvidaremos kel elemento prinsipal de la etika djudia es djustamente la djustisya ke kada uno de entre mozotros deve sigir en direksyon de kualkyer de muestros semblavles, de ke fey o kolor de kuero ke el sea.
