Muevo Ministro İranyano de relasyones eksteryores
Es ke realmente uvo un kualkyer trokamyento en la politika Iranyana kon la instalasyon del muevo governo? Kestyon a la kuala es difisil de responder, partikularmente en estos dias ande el mundo esta realmente en rebuelta i ande nada puede ser afirmado ni desmentido, dias ande todas las hipotezas son posivles i mizmo paresen tener una syerta lojika, sin ke ninguna de entre eyas konstitue el elemento de baza de una sertidumbre,
Segun lo ke eskrivyo el diaryo fransez byen konosido “le Monde” del 5 del mez koryente, el muevo ministro İranyano de relasyones eksteryores “Mohamad-Javad Zarif” auguro “Rosh Hashana alegre” a los djudyos, en lingua ingleza, en su Twitter personal; novela ke fue tambyen konfirmada dos dias mas tadre en la prensa Turka i la Israelyana.
El dicho mensaje es sorprendente sovre todo despues los dos mandatos konsekutivos de Mahmud Ahmadinejad, mezes i mezes ke fueron markados por sus violentes deklarasyones kontra “Israel” ansi ke sus amenazas de kitarlo de la karta jeografika de la rejyon, i tambyen por su negasyon kategorika del jenosidyo djudyo en los anyos maldichos de la segunda gerra mundyal.
Syempre konformamente a lo ke eskrivyo Le Monde, segun Mohammad-Javad Zarif, “el İran no nyego nunka el holokosto”; azyendo aluzyon a Mahmoud Ahmadinejad, el disho: “El Iran no nyego nunka (la shoa), el ombre ke lo izo ya se fue... Anyada buena”.
Debasho estas linyas, foto kopya del twitter en kestyon:
“Javad Zarif @JZarif @sfpelosi:’ Iran never denied it (Shoa). The man who was perceived to be denying it, is now gone. Happy New Year.4:54 PM - 5 Sept 2013“
La Prensa dize igualmente ke un mensaje de felisitation en direksyon de la komunidad djudia del payis a la okazyon de “Rosh Ashana” fue tambyen publikado en el Twitter del prezidente Rohani de una manera muy poetika: (A la ora ke el sol se echa sovre Teheran, auguro Rosh hashana alegre a todos los djudyos i partikularmente a los djudyos Iranyanos ), novedad ke (por una razon deskonosida) fue desmentida el dia sigyente 5 Septembre, de parte del konsejero del Prezidente “Mohammad-Reza Sadegh”, el kual nyego la egzistensya de un semejante Twitter.
Mas de 20.000 djudyos biven aktualmente en Iran…En un pasado no muy leshano, ‘varyas Organizasyones ke defenden los derechos del ombre’ akuzaron el Iran de menospresyar i de maltratar su populasyon djudia, lo ke aktualmente desmente el muevo governo..
De otra parte, segun lo ke mos dizen tambyen varyos djornalistos, ‘el Ministeryo İranyano de relasyones eksteryores’ se esta esforsando de kalmar las inkyetudes de munchos grandes Estados de la rejyon komo tambyen del resto del mundo, konsernando la utilizasyon del potensyal atomiko del payis... Kuala es la verdadera realidad?
