Septembre fue syempre konsiderado komo mesajero del Otonyo, malgrado ke ay ermozos diyas ansi ke fue el kavzo oganyo. Vimos diyas de puro enverano i no de fin de enverano. Fyestimos Rosh Hashana los primeros diyas de Septembre. Mez de Tishri, una suksesyon de fyestas i alegriyas… Rosh Hashana, Yom Kipur, Sukkot i Simhat Tora.. Tishri no es solamente mez de fyestas ma, tambien mez de orasyon, i de pardon. Yom Kipur i el Taanit…El grande savyo Moshe Ben Maimon, (1135- 1240) dize: “Esta peryoda devemos konsiderarmos komo medyo kulpantes, medyo inosentes…”.
La Santa Biblia mos dize: (Num. (Bamidbar)-29-1) “...El primer diya del syeten mez selebraras una fyesta solemna: Rosh Ashana... Es el empesijo del anyo Djudio. Ay de demandarmos, deke el syeten mez i no el primer? Antes de topar la repuesta, kontinuaremos a meldar: “ En el dyezen diya de este mizmo syeten mez, umilyarash vuestras almas, no azerash dingun echo: Yom Kippur... İ el kinzen diya del syeten mez, no azerash dinguna aktividad umilyante, durante syete diyas selebrarash una fyesta en la onor del Kriador: Sukkot...
Aun ke el kalendaryo Djudio ampesa en Tishri, porke la ekspresyon “syeten mez”?? Porke la vida del puevlo Ebraiko ampeso kon la fin del “yugo”, del esklavaje de Misraim, en el mez de NİSAN. Despues sigien İyar, Sivan, Tamuz, Av, Elul i Tishri el syeten mez. La libertad es la baza de un puevlo, de una nasyon.
“Rosh Ashana, literalmente “La kavesa del Anyo” es el diya de Djustisya. Akodraremos syempre este prinsipyo ke fue establesido por los Djudios, miles de anyos antes. “Libertad i Djustisya” son la baza, sin lakuala dinguna nasyon puede egzistir”.
La primeras dos semanas de la anyada mueva ya se kompletaron. Mos estamos aparejando para “Sukkot” i la alegriya de “Simhat Tora”. En pasadas resivi un mesaje konsernando la realizasyon, de la “SUKA”. En primero me kontenti solo de meldarlo. En estos diyas, me lo akodri, i lo meldi de muevo. Es un teksto bastante komplikado, kon ekspresyones i sitasyonas etnikas ke, syempre me detuve de entrar en la ondor. Porke munchas vezes depasan mis simples konosensyas.
Aun kon todo, en estos diyas de Sukkot, pensi de relatar unos, dos paragrafos ke me paresen ser mas simples: “A la salida de Kipur, la mizma noche se ampesa la konstruksyon de la “Suka” para metermos imedyatamente debasho la proteksyon de esta “MİTZVA”. Es rekomendado de konstruirla si mizmo, i no kon el ayudo de otra persona. La Suka deve situarse en un lugar limpyo de muestra guerta o balkon. No deve ser a proksimidad (serka) de aguas suzyas o otras suzyedades. Es tambyen rekomendado de morar, kere dezir de bivir ayi durante los syete diyas de la fyesta de Sukkot, para konformarmos a la “Ordenansa” de la “TORA”. (Levitiko (Vayikra)- 23-42.)
Despues esta sigiendo la manera de fabrikar la Suka, dando los detalyos los mas minimos, komo la kualidad i el djenero del materyal, sus mezuras, los entervalos entre kada pedaso ets... La Suka es una Mitzva bien partikolara. La Mitzva del Lulav simboliza kon sus kuatro plantas, el fakto ke malgrado las diferensyas, los Djudios pueden i deven ser unidos.
Keridos lektores. Kada anyo en estos diyas, yo perkuro ansi ke lo azen i los otros amigos i amigas, a azer tekstos sovre muestras tradisyones relijyozas, muestras fyestas ets..Syempre no es fasil de topar frazas diferentes. Es por esta razon ke kero meter el punto final kon unas kuantas linyas de un ansyano artikolo miyo: Sukkot es una de las tres fyestas de pelerinaje. Shemini Atseret i Simhat Tora serran las fyestas del mez de Tishri. Kon los bayles i alegriyas, el Djudio anula su “Ego” en achetando la otoridad de la Tora. Terminamos su lektura i la ampesamos de muevo, de vista porke no ay fin, a la palavra del KRİADOR. SHANA TOVA …
