La semana ultima pasimos un weekend (fin de semana) muy agradavle.
Shabat demanyana unos amigos de Mersin vinyeron a vijitarmos a la isla. Teniyan un dezeo grande de konoser “Burgaz”; una isla ke no peryo ainda nada de la natura, de la mar i de los moradores. Mizmo ke troko unas syertas kozas, ayinda se puede dizir ke es un kazal chiko ande moran los myembros de una famiya grande.
Burgaz es una isla chika ande se konosen todos unos kon los otros; los moradores, el bakal, el frutero (manav), el kasap, el vendedor de agua, los vendedores del Pazar i de todo modo de koza.
A la abashada del vapor, kaminando en la eskala para iyir a kaza, todos se saludan i demandan komo paso akel dia.
Komo vinyeron solamente por dos dias, en primero mos fuimos kon fayton a “Kalpazankaya” ke es un lugar entre los arvoles al bodre de la mar, una mar muy limpya ke se ve las pyedras, el aver limpyo, la kayades de la natura ande se oye solo los pasharos i los perros, no ay bruido de arabas, es un trezoro guadrado aryento de la shara (orman).
Komo de tyempo maraviyozo!...
İzimos el torno de la isla i a la torna los amigos kijeron entrar a la mar. El tyempo estava klaro, aviya sol, despues la luvya un tyempo tivyo. Nadimos en la mar muy limpida (berrak) i mos fuimos a un restorante en el bodre de la mar. Pasimos en el restorante unas kuantas oras muy ermozas en avlando i riyendo.
Alhad demanyana mos fuimos kon mis primos i sus ijos ke vinyeron de Israel, mi ermano, mi tiyo i mi madre a Heybeliada, ke es la isla de mi chikes i manseves. Kon grande nostaljia arrivimos a “Heybeli”.
En primero mos fuimos a la kaza ke bivimos antes kuarenta anyos. La nostaljia de ver la kaza de tavla en su lugar sin trokamyento, solo boyadeada a blanko, mos akodrimos kon toda la famiya de los vizinos ke moravan en el doredor, los turkos, gregos i djudyos ke eramos komo una famiya. Las puertas avyertas, sin espanto de ladron, entravamos komo nada a la kaza ke dezeavamos.
Ke senseridad, ke kerensya, ke amor ke aviya en akel tyempo, antes kuarenta anyos!.....
Malorosamente oy peryimos esta unyon, este amigable, todos estan koryendo de detras de sus problemas.
En kada kaza una braza!...
Mirando al entorno de la kaza, en supito una mujer aedada salyo al balkon i me demando a ken esto bushkando. Le dishe ke moravamos antes munchos anyos aki i ke esto kontemplando (seyretmek) toda la kaleja kon el kampo (çayır) delantre las kazas ande djugavamos kuando eramos chikos, i akodrarme los anyos ke pasimos aya.
Esta damma de noventa anyos me demando si konosko a Zelda ke es mi madre, a Hayim ke es mi tiyo (z.l.) i Bensiyon ke es el ermano chiko de mi madre.
Fue topadura de kosfuegros kon mi madre i mi tiyo, bezos, abrasos kon amistad i avlimos una ora ke somos los ijos i los inyetos de sus vizinos ke se frekuentavan.
Entrimos a la kaza ke moravamos kon la permisyon de los moradores de oy i vimos ke aryento lo trokaron enteramente, i salimos a la guerta de detras del mupak ande aviya arvoles de igos ke mos suviyamos para arankar los igos vedres i komerlos kon muncha savor.
Despues de un komer de midi alegre (neşeli), kaminimos la una partida de la isla en akodrandomos; ken morava en ke kaza, la eskola primera ande estudyo mi madre, el kampo ande se topavan los aznikos ke mos suviyamos para azer el torno de la isla, el kal, la kaza de “İsmet İnönü”, la eskola de los papazes, el çarşi, las kazas antiguas (eski) restoradas, “Asaf” el gazino en el bodre de la mar ande mos ivamos de demanyana para pasar el diya, “Halki Palas” el otel famozo i otros lugares.
Pasimos un dia muy enteresante i emosyonante, ande los turistos estuvyeron muy kontentes, i oras de tadre tornimos kon vapor a la sivdad ke veramente despues del kalmo de la isla no se esta puedyendo bivir a kavza de la muncha djente, del trafik, i del bruyido.
