29 OKTOBRE 1947-2013
En estos diyas estamos kumpliendo otrun aniversaryo de muestro jurnal. El semanal Şalom izo su primera publikasyon en el 29 Oktobre del 1947, debasho la direksyon de los sinyores Avram Leyon i İzak Yaeş. Era enteramente en lingua Judeo- Espanyola. El buro era en Galata, Şair Ziya Pahsa, Lakerdacı No.6/1 serka el Kal de los Frankos. Oy en diya, es una kalejika ke vijitamos bastante, syendo ke la entrada del Sentro Kultural Neve-Shalom es ayi. Me akodro komo oy, ke mos fuimos kon mi padre (de b.m) a vijitar el Sr. Leyon (de b.m) i felisitarlo.
En los anyos 1980 pasaron a Osmanbey. Yo, desde el 53 ya morava en Nishantash, bastante serka de ayi de sorte, mizmo si no es komo lo ago aktualmente, tuve nombrozas okazyones de ir al buro de Osmanbey. Eran los primeros anyos ke ampeso a publikarse en Lingua Turka. Aviya un “kanton” “hepimiz birer sanatçıyız”(todos semos artistos), ande embiyava yo de vez en kuando chikas poezias miyas en turko.
El fondador del Şalom, Sr. Avram Leyon, en el empesijo enkontro nombrozas difikultades i tambien munchas vezes en el korso de los anyos. El, en un artikolo lo eksprimio kon estos byervos: “No kero repetar las sufriensas ke pasimos myentres los 30 anyos pasados…Malgrado las presyones ke mos fueron echas, no mos desviyimos del kamino ke mos trasimos, mesmo en los momentos los mas eskuros…El amor por servir nuestra kollektividad ke nos dyo una fuersa por kontinuar la mision ke empesimos antes trenta anyos i nos kontentamos mesmo en este çiko formato de kontinuar a azer apareser regularmente este çiko jurnal…”.
Avram Leyon era un vero luchador. Yo puedo afirmar ke me topo en una pozisyon de konfirmar las difikultades ke el enkontro, syendo ke eran buenos amigos kon mi papa. I en desparte moravamos en el mizmo imoble. El Şalom debasho la direksyon de Avram Leyon aparesyo asta la mitad de los anyos 80. El fue administrator, eskrivano prinsipal, responsavle de la “mizanpaj” i distributor. El fue TODO
