15.11.2003 Estambol paso un dia ariskuro en la tefila de shabat demanyana en las dos sinagogas;
Şişli “Beth İsrael” i “Neve-Shalom” en Şişhane.
El terorizmo izo un mal inolvidavle, una trajedia de estremeser (korkunç) ke tomo komo buto; muestros ermanos, muestra komunitad i muestro pais.
Fue veramente una katastrofa muy triste ke mos abatyo a todos, en estos lugares santos, en arogando al Dyo todo el Puederoso para ke se aga todo bueno; i no mos desho guste de bivir.
No me puedo olvidar de este dia ke peryimos
23 personas (z.l.), ijos, ijas, madres, padres i paryentes.
Este anyo fue la komemorasyon de los 10 anyos ke pasimos kon amargura.
El lider del fondo (fon) “Yoel ÜLÇER”; mansevo luzyo, enstruido, reushido (başarılı) i sin espanto ke peryo la vida para protejar los yahides; “Rozi ÜLÇER” kon un grupo de mansevos i mansevas prepararon una nochada de komemorasyon ekstraordinarya en la sinagoga Neve-Shalom.
A la entrada del kal; todas las fotografias del dia
de la bomba, i los detalyos eskritos en la tabelas (levha) de los ke se muryeron.
Un mansevo distribuindo (dağıtmak) a los ombres un livro de orasyon kon el slogan “İNENİ” ke kijo dizir;
“Yo Esto Aki” en ebreo i una takya mov ke komo kolor es el sembol del dolyo.
Una manseva distribuando a las mujeres el livro de orasyon kon un shal mov. Todos kon las takyas i los shales en los ombros estavan kompletando el dekor de la sinagoga. Los hahames i hazanes vistidos pretos, en los pusoz (bilek) kordelas de kolor mov, la djentorya, todo estava muy emosyonante.
Tanto djente ke no aviya mas lugar de asentar.
Dos hazanes mansevos kon sus bozes majikas (sihirli), stavan orasyonando de aryento el korason. Ocho kriyaturas meldaron la “Shema” en forma de koro ke los ombres kon las mujeres los akompanyaron.
Un mansevo kon una manseva avlaron sovre el sujeto de este evenemento ke ariskureso la vida de munchas famiyas en peryendo sus ijos, ijas, madres i padres.
Despues, el presidente de muestra komunitad;
“İshak İbrahimzadeh” izo una avla muy sentimental sovre la dolor de los ke peryimos, i la situasyon del mundo ke kale luchar (mücadele etmek) kon esta lokura (çılgınlık) para pueder topar a la fin la ermandad, la armoniya i el entendimyento (anlayış).
Los ke asistyeron a esta seremoniya yorando de la emosyon, se akodraron de akel dia maldicho kon los korasones espedasados de tristeza.
Esto mos amostra la kerensya, la amistad de la umanidad.
La kerensya es un sentimyento ke pasa de unos a los otros.
La amistad es mas muncho dar, ke de tomar, i de no ser egoisto. La persona ke kere byen, es franka, sin mintira, afektuosa, i enduljente (tolerans) al den frente.
La amistad; es verdad, ermozura, komprehansyon (anlaşılmak), i armoniya.
Fue una organizasyon perfekta en todo modo punto de vista. Felisitasyones a todos ke se esforsaron (çaba) para realizar esta komemorasyon ke fue muy reushida.
Ke seyga pasado, i el Dyo ke mos guadre de las kozas ke no mos puedemos guadrar; porke las personas no tyenen dinguna valor delantre de las desgrasyas del mundo.
El Dyo ke de pasensya a las famiyas ke peryeron sus almas, i sus serkanos en este evenemento.
Esto rogando al Dyo; ke no ayga mas por dingunos este modo de evenementos tristes, i kedaremos todos endjuntos kon amistad i pas en el mundo.
