Ay sujetos sovre los kualos varyos akontesimyentos resyentes mos ovligan a revinir… en la mezura ande esto me sera posivle, me vo esforsar de no repetarme, no se si vo enteramente parvenir, en todo kavzo demando vuestra induljensya.
“Los terrivles aksidentes maritimes en la Mediteranea de embarkasyones por la mas parte defektuozas i frajiles yenas de desmazalados fuyendo no solo la mizerya i la ambrera, ma tambyen la krueldad i la kovdisya monetarya de varyos kapos de payizes afrikanos ke kometen abuzos de konfiansa impardonavles, ansi ke la afluensa de mas a mas grande de migrantes klandestinos ke, malgrado el perikolo, kontinuan a fuir en direksyon de la Evropa” meten varyos payizes de este kontinente en un estado de grande konfuzyon konsernando la desizyon a tomar, syempre perpleksos delantre un problema ke prezenta dos solusyones a primera vista kontraryas la una a la otra, ma ke tyenen kada una ‘argumentos justifikativos rasyonales i muy komprensivles’:
a)‘ Kontrolar severamente i serrar las frontyeras maritimas afin de evitar (en la dimensyon ande esto es posivle) una invazyon sin kontrol’ o byen : b) ‘prezentar una facha mas induljente i no mandar atras los ke demandan avrigo’.
La primera solusyon ovedese al instinkto de konservasyon del ombre, ke konsyentemente o inkonsyentemente lo pusha a pensar a su propyo futuro i al de sus serkanos en el espasyo jeografiko ke es en este momento el suyo, ma ke (visto la enorme diferensya de ritmo de prokreasyon entre el puevlo afrikano i el oksidental) riska en unas kuantas desenias de ser superpuevlado de estranjeros, kada uno kon sus uzos i kostumbres, sus manera de bivir i sus paradigmos. İnstinkto de konservasyon ke en varyos kavzos puede ser konsiderado komo una falta de solidaridad i de asistansya a personas en perikolo.
La segunda solusyon muy humanitarya, eya, diktada por un maraviyozo sentimyento de piadad i puede ser de sinsera revolta kontra la indjustisya sosyal ke egziste en el mundo, refuza de deshar murir ombres i mujeres ke fuyen para demandar azilyo en tyerras mas hospitalyeras.
Eske un multikulturalizmo armonyozo i duravle en un mizmo espasyo terrestre, es posivle? o por avlar mas klaro: Eske dos o tres puevlos no solo etnikamente ma tambyen kulturalmente diferentes, kada uno kon sus dogmas i konseptos, sus fey i konviksyones pueden bivir en un mizmo payis, sin ke (a un syerto momento) el uno de entre eyos no pene a konveser o mizmo a diktar a los otros su propya vizyon del mundo o su propya kreensa?
Komo lo meldamos en varyos kotidyanos, una grande Konferensya al sujeto de la ‘migrasyon klandestina’ esta aktualmente en preparasyon en la Unyon Evropea. Ke sera el rezultado de las varyas diskusyones ke tomaran lugar? Es ke se puedra topar una solusyon realmente satisfazyente praktikavle sin pyedrer su humanismo?
Por el momento, los payizes nordikos afirman un syerto desinteres por el sujeto. Por kontra, los del Sud, los ke se topan al bodre de la Mediteranea komo la Fransya, la İtalya, la Espanya ets…afirman sus opinyones sin por esto ser syempre de akordo entre eyos… los unos prekonizan komo syempre un sever kontrol de las frontyeras afin de impedir una intruzyon masiva de klandestinos. Otros, por la mas parte sosyalistos fervyentes, insisten sovre una kondukta mas humanitarya.
Ke sera la repuesta a este terrivle dilemne?
