Komo kaji kada anyo, el entuzyasmo fue abosuto i unanimo konsernando la alta kualidad kultural del Limmud de oganyo. Limmud es la fyesta del esprito i de la kuryozidad syentifika komo tambyen artistika, el avre puertas sovre muevos orizentes i da a los partisipantes una mueva vizyon del mundo kon su potensyal intelektual i espiritual. Muestra kolega Şeli Gaon ke asistyo personalmente i se esforso de sigir lo mas posivle de konferensyas, esta aparejando un largo artikolo al sujeto de todo lo ke oyo, vido i sintyo, artikolo ke sera publikado en el SALOM de la semana a venir. Todas muestras felisitasyones i agradesimyentos a los ke fundaron i a los ke kada anyo aparejan en muestro payis un muevo programa de esta manifestasyon kultural, lakuala realsa el nivel intelektual de muestra komunidad.
