Fundado por Selim i su mujer, el “Sentro Salti” situado en el kuadro de la Universidad Bar-Ilan de Tel-Aviv i dedikado al estudyo lenguistiko i literaryo del patrimonyo Kultural sefardi, fyesto la semana pasada (el 22 del mez koryente) el dyezen aniversaryo de su fundasyon.
Selim Salti ke poko antes resivyo el titolo de ‘doktor honoris Causa’ mos mando la kopya del diskorso ke el pronunsyo a la okazyon de este dyezen aniversaryo, lo ke mos da de una manera muy klara, el bilancho de todo lo ke se izo en el intervalo de esta desenia i de las grandes realizasyones ke fueron kumplidas en el kampo de la promosyon i adelantamyento de la lingua i kultura sefardi.
La revista “El Amaneser” vos dara la semana ke vyene el teksto integral de este diskorso kon todos sus detalyos, yo me vo limitar a komunikarvos lo ke personalmente penso de la novle aktividad de este Sentro i de su impakto inkontestavlemente muy pozitivo en el mundo Sefardi.
Antes de todo devo dezir ke es un honor para muestra komunidad de Istanbul ke uno de sus ansyanos myembros rezerve a realizasyones kulturales una grande parte del revenido de su karyera profesyonal.
‘El akto de jenerozidad de la famiya Salti i la aktividad personal de Selim en la sirkunstansya’ mos ambezan ke es un dover de partisipar (de ke manera ke sea) a la reanimasyon de un idyoma konsiderado munchas vezes komo kaduko i produkto de una grave dekadensya, ma ke aun el menospresyo i el desdenyo de una partida bastante ancha de muestra sosyedad, se obstino syempre a no murir.
Todos savemos ke, echo de un vokabularyo espanyol mesklado a munchas otras linguas, muestro idyoma se prezenta a munchos de muestros korelijyonaryos, komo un dialekto heteroklito de una tekstura por seguro heterojena ma ke yeva en sus entranyas toda la sufriensa komo tambyen el impulso vital de mujeres i ombres ke kerian bivir i afirmarsen…
Parafrazando lo ke avia dicho en el pasado uno de los ansyanos prezidentes de la Unesko: “kada lingua ke dezaparese es un emprovesimyento del patrimonyo kultural de la humanidad” puedemos a muestro torno dezir: ‘kada esforso ke se aze para mantener en vida kualkyer elemento sinyifikante de muestro pasado’ es un enrikesimyento de la herensya ke mos desharon muestros avuelos.
Adjuntandose a la intensiva aktividad ke se produze a este sujeto en munchas parte del mundo, el lavoro del ‘Sentro Salti’ no es unikamente una reanimasyon de la lingua, ma tambyen un retorno a la vida de su patrimonyo kultural , el kual es estudyado en profundidad asta el nivel de ‘doktorato’ debasho la direksyon del Dr Smuel Refael ke tuve personalmente el onor de enkontrar i de apresyar mucho en varyos simpozyomes i kolokyos organizados en Londra komo en Israel.
En desparte de su ancha kultura jeneral el Dr Smuel Refael es un grande espasyalisto del arte poetiko sefardi i partikularment de poemas eskritos de parte de deportados antes de ir a la muerte, ovras ke ekspresan kon intensidad el dezespero de ombres i mujeres arrankados krualmente a la vida, ke el mos aze konoser kon una sensibilidad partikular.
En el diskorso ke Selim Salti pronunsyo a la okazyon de este dyezen anniversaryo, el dize tekstualmente lo sigyente: ‘’...la persona ke mos ayudo lo mas fue el presedente prezidente de la universitad Prof. Moshe Kave, ke nunka (lo repeto nunka) manko de apuyarmos para ke esta institusion unika en su tiempo se dezvelope presto i ke alkanse al nivel el mas alto de estudios. Kero apuntar en esta okazion al apoyo ke resivimos de los dekanos ke segiron a la direksyon de la fakultad a la kuala apartenemos, i por lo mas rengrasiar al profesor Moshe Orfali por su grande ayudo en la reorganizasyon del sentro anyo pasado nominimos kon la aprovasyon del rektor de la Universitad al Dr. Dov Hakoen viejo estudiante . El del sentro komo “maestro de konferensia”-martse- erudito renomado ke lavoro anyos en el instituto Ben Zvi. ‘....Saludo de mezmo al muevo dekano de la fakulta a la kuala apartenemos, el prof. Eli Assis al kual le auguramos grande sukseso en su muevo posto. El prof. Eli Assis es ijo del muy konosido prof. Yomtov Assis z”l, direktor del instituto BenZvi de Yerushalayim, ke disparesio tan deprano, poko tiempo antes” (fin de sitasyon)
En este mizmo diskorso, Selim Salti mos anunsya tambyen ke el 5 de desembre 2013 sovre la sugjestyon de muestra amiga Zelda Ovadya, un dia entero sera konsakrado a fyestar el Djudeo-Espanyol, lo ke sera repetado kada anyo a la mizma data.
Es ansi del Sentro Salti ke en sus esforsos de ir syempre adelantre kon el apoyo kultural de grandes intelektuales, afirma su importansa ke ira syempre mas leshos i mas alto.
