…La vida es una korretina kontra el tyempo ke pasa. Ampesi mi teksto kon la kontinuasyon del titolo. No es primera vez ke eskrivo sovre “la edad”. Ma no topariya yo otro diya mas mijor, mas partikolar ke oy. El diya ke se va publikar este teksto, syendo mi aniversaryo, desidi de servirme otruna vez de la konsepsyon “vejes “ o “entrar en anyos” si preferash. Antes de kontinuar kero aklarar un punto! La fraza tan pompoza !! del titolo kon su kontinuasyon, no es tomada de dingun nombre ilustro. Es enteramente miya. Komo la topatesh??
André Gide (1869-1951), famozo eskrivano i humanisto fransez , en sus memoryas dize: “No puedo kreer ke oy vine a la edad de akeyas personas ke, en mi manseves me paresiyan muy aedados…” Keridos amigos, no pudriya aver mijor byervos para ekspresar yo tambien mis sentimientos, mis impresyones en este diya de mis ochenta anyos.
Nunka guadri mi edad, syempre fui amiga kon los anyos, arresivyendolos kon sezudeza, syendo en “paz” kon la vida i kon mi entorno. Kualo es manseves? Ande ampesa la vejes?. No egziste una baryera fizika para pueder apartar una de la otra. Antes de todo es una konsepsyon subjektiva i penso ke la mentalidad de la persona djuga un grande rolo. Konosko mansevos de 50-55, ke se syenten aedados. Ay otros ke kontinuan a ser aktivos de una manera o otra, mizmo a la edad de 70-80 i mas.
El pasar de la manseves a la edad matura, (atansyon! no kero afilu dizir vejes) es tan avagorozo ke, jeneralmente no mos apersivimos. Yo, kon mi vanda poetika, syempre pensi ke, es komo el otonyo kon las manchas amariyas o ruvyas ensima las ojas de los arvoles, a poko, a poko tomando el lugar del enverano antes de ampesar su viyaje verso el invyerno. Naturalmente sin olvidar las Primaveras ermozas de muestra vida…
Una dicha ekoseza dize: “Las personas pensan ke en bivyendo se envejesen. Ma, es en NO bivyendo ke se azen vyejos..”. Ay muncho de komentar sovre esta dicha. Yo ya lo ize a mi manera i esto kontente. A vozotros keridos lektores de kitar una lisyon! Entrar en anyos…Bivirlos ma komo? Travarmos a un kanton kon el preteksto o la ekskuza “ya paso de mi, a esta edad kualo puedo azer?..ets..”. Si estas en buena salud, los anyos no deven ser un obstakolo o una razon para estar inaktivos. Si no me yerro es Montaigne ke aviya dicho, no es la kantidad de los anyos ke se biven, ma sus kualidad ke es importante.
No ay “EDAD” para ambezar, ganar muevas konosensyas, tener un buto pozitivo, lavorar, dar una mano de ayudo ets.. La persona keda manseva, kontinua a serlo en la mezura de sus butos, su veluntad i koraje a realizar sus esperansas i su perseverensya para kompletar sus proyektos. En kurto, del momento ke dechido de konsiderarse komo aedada, de no tener algun eskopo en la vida, efektivamente, ya es aedada…
Despues de tantas palavras, devo tambien atorgar una “realidad” importante: la “EDAD”. No se puede pretender ke una persona de 70 o 80 tenga las mizmas fuersas, mizmas kapachidades fizikas de una de 30 o 40 anyos. Muy normal, desde unos, kuantos anyos esto bivyendo kon un ritmo muncho mas avagarozo, me esto kansando mas presto ets... Es en la natura de las kozas. Orozamente ke eskrivir, meldar no esta demandando muncha fuersa fizika!!
Ya se ke en las kuatro partes del mundo ay amigos, amigas ke pensan komo mi. Mos konosemos unos, o no. Ke importa? Ma, ya savemos ke tenemos el mizmo buto, el Amor de muestra Lingua i Kultura. Estamos perkurando a konsevarlas i transmeter este presyozo patrimonio a muestros inyetos. Aki, entre otros kero sitar una revista muy presyoza, “Aki Yerushalayim” , fondada por muestro amigo Moshe Shaul, en 1979. Mis karinyos i admirasyon tambien a muestra amiga Zelda Ovadia.
İgualmente, apresyamos el lavoro de muestra amiga, Rachel Amado Bortnick ke, kon el forum “Ladinokomunita”, avyo anchamente las puertas para ayudar a propajar el Judeo-Espanyol. Espero i sueto ke, i las futuras jenerasyones van a kontinuar a luchar. Mi grande dezeo es ke no kede en esperansa, ma ke se transforme en konviksyon i aksyon.
