El ultimo raporto sovre la provedad del “National Insurance Institute” mos dize ke ay mas de 1.700.000 israelyanos ke biven debasho el umbral de la provedad, entre loskualos multiples aedados i munchos ninyos. Shifro ke (en un payis evoluado tal ke es el Estado Hebreo kon su alto nivel intelektual i universitaryo) parese ser egzorbitante, i lo ke es lo mas trajiko es el problema de la edukasyon de los ninyos de ke orijen ke sean.
A este sujeto, la gazeta Jerusalem Post mos ambeza aproksimativamente lo sigyente: “la inkyetud se fokaliza sovre los ninyos. El raporto anual de la asosyasyon Latet avla espesyalmente de las konsekuensas de la provedad sovre la vida de los ninyos i adolesentes... Una grande kuantidad de ijikos i ijikas de famiyas proves se topan ovligados de lavorar i 10% de demandar sedaka en las kayes”.
Esta gazeta mos dize tambyen ke: “Un sinken de las famiyas ke fueron interogadas deklararon aver renunsyado a dar una edukasyon konvenivle a sus ninyos, porke para eyas la nesesidad vital es de konsakrar todo sus revenido a produktos de komanya, lo ke rende imposivle la akizisyon de kualkyer produkto eskolaryo.”
İnevitavlemente una kestyon mos vyene al tino: Ke sera la vida i sovre todo la personalidad de estos futuros adultos ke no resiven ninguna edukasyon eskolarya, por la mas parte mankos de kualkyer konosensya intelektual, kondenados jeneralmente a kedar syempre en estado de inferyoridad?
Segun lo ke ‘los partidos de la opozisyon’ dizen a este sujeto, una grande kuantidad de famiyas ke se topavan en la klasa ekonomika medyana no parvyenen mas (mizmo si ay dos personas ke lavoran en la mizma kaza) a dominar la situasyon de un budjeto de mas a mas dekadente i difisil a ekilibrar. Este nivel de provedad konstitue una amenaza para el payis. Lo mas de estas personas ke se topan en estado de grande difikultad son lavorantes, i mizmo 5% de ninyos de entre eyas, en edad de ir a la eskola, son ovligados de lavorar.
Se entyende byen ke una de las kavzas de esta situasyon dramatika es la grande kriza ekonomika ande el mundo se topa aktualmente, ma komo tambyen lo dizen los partidos de la opozisyon: ‘Inkumbe al governo de penar a erradikar la mizerya i reduzir las inegualidades’.
No mos olvidaremos ke el problema de la edukasyon de los ninyos fue i es syempre una de las grandes prioridades del Djudaizmo. Me akodro personalmente aver meldado en un livro eskrito por un grande savyo relijyozo, ke mizmo en dia de Kipur ande diskusyones sovre kualkyer sujeto profano son prohibidas, la ke konserna la edukasyon de los ijos i ijas es eya permetida i mizmo muy byen vista. La buena edukasyon eskolarya asegura sin dubyo el futuro de Israel ansi ke la kualidad de su dinamizmo.
La Biblia, eya mizma mo dize: “Konvoka el puevlo entero: varones, mujeres, ninyos ansi ke el estranjero ke se topa en tu sivdad, afin ke oygan i se ambezen (Deut. 31/12)”
Komo todos la savemos i ke es sertifikado por ilustres savyos relijyozos, las tres relijyones monoteistas repozan sovre una baza komun echa de tres pilares, todos muy importantes para las tres kreensas i ke varian unikamente en sus grado de prioridad diferente para kada una de entre eyas.
Estos pilares son:
a) La Fey. Obedyensa absoluta a los preseptos i tekstos profetikos - El Islam.
b) El Verbo. İmportansa de las orasyones i de las predikasyones– el Kristyanizmo.
c) La Aksyon. La Valor de los aktos ke kumplimos –El Djudaizmo.
Si... el Djudaizmo es antes de todo una ethika aktiva. Mas ke la orasyon, los ayunos i la obedyensa absoluta a preseptos antiguos (ke guadran syempre sus inmensa sakralidad), vyene ‘el akto de ayudo’ en direksyon de los ke se topan en estado de menester i de difikultad.
Meldamos tambyen en la Biblia:
“El ayuno ke me gusta, es Romper las kadenas de la indjustisya.
Dezatar las ataduras del yugo.
Liberar los ke estan oprimidos.
Meter fin a todo modo de servidumbre”
(Isaie (58/6-7)
