Woldo Emerson dize: “No obskureskas tu vida ni te kanses a enderechar los otros, la sola persona ke tyenes el ovligo de enderechar es tu mezmo
CENİ FRANKO GÜLNİHAL
“Entrar adriyento de muestro korason i topar aya muestra verdad” es komo saver mirar en la profundura de muestro Espejo, ma malorozamente no semos siempre prontos a oyir o ver lo ke no keremos oyir ni ver, envezes no tenemos toleransia para ningun problema i topamos la kulpa en el ke se topa enfrente de mozotros.
Okure munchas vezes ke alguno mos demande si konosemos byen, kon su sal i su pimienta, tala o tala otra persona; Si semos de edad mediana i ke el individuo en kestion es uno de muestros serkanos, espontaneamente respondemos afirmativamente; la vida ke bivimos, los varyos kavzos a los kualos fuimos enfrentados, en un biervo muestra sola eksperyens mos parese sufizyente para azerlo.
Ma kuando mos demandan si konosemos muestra propia personalidad, hezitamos i pensamos un syerto tyempo antes de responder.
Bueno, deke mos viene tan deficile de abashar en mozotros mizmo i mirar adriyento de muestro korason? Puede ser el espanto de topar verdades ke muestro egosentrizmo refuza de ver.
Los ke de eyos para eyos saven analizarsen profundamente, saven entonses mijor analizar los ke se topan enfrente de eyos antes des dizir kualkyer koza negativa a sus sujeto, i ansi pueden ayegar a rezultados muncho mas objektivos i verdaderos.
Konoserse si mizmo en profundidad permete de mijor entender el ke esta enfrente de mozotros, i ansi las relasyones inter humanas devyenen mas sinseras i muncho mas fruktuozas.
