Entre los nombrozos artikolos sinseramente muy interesantes, eskritos por intelektuales de muestra komunidad i publikados en la revista mensual ‘Şalom Dergi’ de la kuala Nelly Barokas es la editora, meldi tambyen: El de Marsel Russo ke mos da ia vizyon de lo ke era la situasyon en la Almanya entre las dos grandes gerras mundyales ansi ke de los kompleksos psikolojikos de un ombre en su dezeo loko de afirmarse; i el de Süzet Sidi relatando la entrevista i la larga konversasyon ke eya tuvo kon Corry Guttstadt, dos grandes artikolos ke partikolarmente mos avlan de la Shoah.
Por un largo momento eyos me yevaron atras en mi pasado, a la epoka leshana de mi adolesensya i me izyeron personalmente akodrar todo lo ke meldavamos en la prensa estranjera la kuala mos transmetia la atmosfera en la kuala se aparejo este akto kriminal ke kedara syempre un kavzo imposivle a entender en su voluntadad de erradikar totalmente el puevlo djudyo de la superfisia de la tyerra, atmosfera malsana i paradoksal kon sus tendensyas diferentes. De una parte: alta kultura, amor del arte i de la syensya, de la otra: orgolyo nasyonal eksesivo i obedyensa syega kaji otomatika a los ordenes ke venian de altas esferas politikas, lo ke kosto la vida a 6 milyones de inosentes; krimen no solo kontra la humanidad en su konsistensya fizika, ma (muncho mas grave) krimen ke introduzyo un dubyo konsernando el nivel de la Konsyensya i de la Dinyidad humana.
Es verdad ke desde un largo tyempo,la Almanya se topava en una situasyon ekonomika ke la metia en estado de inferyoridad, ma nada puede justifikar ni mizmo eksplikar este odyo i partikolarmente este akoso kriminal kontra un puevlo ke era el mizmo martiryo de un destino dolorozo.
El elemento el mas amargo i inkomprensivle de este drama inhumano fue de aver sido perpetrado konsyentemente de parte de individuos kultivados, los unos enamorados de Nietche komo tambyen de Kant i Hegel, los otros fervyentes amatores de pintura i muzika, oditores fideles de Beethoven i de Mozart...
El Holokosto fue kumplido kon sangre fria, por personas en estado de kompleta lusides i konsyentes de lo ke devia ser el rezultado, el fue perpetrado depues largas refleksyones i puede ser nombrozos kambyos de ideas.
Syertos intelektuales kontemporeanos se demandan si un dia, en un futuro leshano, a titolo postumo, se puedra perdonar a los ke, aun informados de lo ke se pasava, kedaron pasivos i lo desharon kumplir sin protestar kon fuersa?
Komo puede ser ya lo tengo dicho i otra vez en esta mizma pajina, ay de esto unos kuantos anyos, un djornalisto avia demandado al filozofo Vladimir Yankelevich entonses en vida, si el puedra un dia akordar su perdon a los ke kedaron sin reaksyon. El savyo respondyo –Perdonar? No kreo… En todo kavzo, nunka a Heiddeger-.
Heidegger fue un filozofo del empesijo del venten siglo ke tuvo una grande influensa sovre la manera de pensar i las teorias filozofikas modernas. Algunos de sus dishiplos i admiradores le guadraron syempre sus fidelidad malgrado las relasyones amigavles ke el tuvo durante la maldicha gerra kon los dirijentes nazis i partikolarmente malgrado su pasividad kontra el odyozo krimen ke se perpetrava. Otros komo Manuel Levinas, Luc Ferry, Vladimir Yankelevich ets…ets..no pudyeron nunka akseptar su silensyo.
I inevitavlemente una kestyon mos vyene al esprito. Desde 70/80 anyos ke esta trajedia se produzyo, es ke la atmosfera se klarifiko? Eske la suma de odyo en direksyon del djudaizmo devino manko violente? Eske el mundo se humanizo realmente en sus aspirasyones…?
Imposivle de pueder responder...
