No se komo ampesar a este teksto ke no estava del todo en mi program de este mez. Frankamente, yo pensava aparejar en dos paertidas un largo teksto de komemorasyon por el 27 Enero 1945, data de la Liberasyon de Auschwitz. Dunke fue una seriya de azardos ke me izo trokar de idea i eskrivir oy el artikolo ke vash a meldar. Dishe azardo, ma en realidad no es egzaktamente ansi, sino ke dos artikolos ( o chikas novelas si preferash) ke, kon un poko de retardo meldi en las pajinas del Şalom. Muy probavle ke munchos lo meldariash tambien.
El primer teksto datado del 25-12-2013 (p-10) esta konsernando la demisyon del Prezidente de la Munisipalidad de Gföhl, chika sivdad de la Austria. Esta persona, tomando komo eskopo los jurnalistos i los djudios, fue ovligado de dar su demisyon achakes de sus ideas i proklamasyones rasistas i antisemitas.
En una reunion tratando de la kestyon de los poveretos “refujyados” (egzilados), el disho: “…del estado de akeyas personas me lo futro!!.. Ma, son los jurnalistos los responsavles de este problema…Los jurnalistos deven ser enforkados, komo fueron los djudios…” .El sinyor prezidente ya demando pardon por estas palavras malorozas, ma muy tadre. No vale la pena afilu de azer komentaryo sovre esto.
Vinyendo al artikolo del 1-1-2014 (p-8). El titolo dize “La Filarmoniya de Vienna esta tomando atras los premios ke dyo a los nazistos”. En rezume: la famoza Orkestra Filarmonika de Vienna, aktualmente se topa facha a facha kon fuertes kritikas. No pudiendolas (o puede ser no dezeoza!!) de afrontarlas, desido de tomar atras los premios akordados a 6 altos personajes nazistos de la epoka maldicha. Epoka nombrada komo la mas “oskura de la İstoria”. Inguart, uno de entre estos, fue ministro de Hitler. Djuzgado en el Tribunal de Nurenberg, fue kondanado a muerte, akulpado de krimenes kontra la Umanidad.
Komo se save, desde akeya epoka de la 2. Gerra Mundiala, la Orkestra Filarmonika de Vienna gano una fama enternasyonal kon sus tradisyonal konsertos de muevo anyo. Asigun el teksto ke meldi, en el anyo 1942, el 50% de los muzisyanos eran miembros del Partido Nazisto. Antes de pasar a la tresera partida de mi teksto, kije espesyalmente apoyar sovre la ultima fraza ke vinish de meldar….Deke??...vamos a ver…
Myerkoles 1 de Enero…Despues de medyo diya me ize un kafiko i me asenti enfrente la TV. No vos pareska keridos lektores, ke paso oras enfrente este kuti majiko! En vezes ay programes enteresantes i de vez en kuando dulses sorprezas. Egzaktamente komo fue el kavzo el primer diya del 2014.
Fue en azyendo “zapping” ke enduna kedi frente el kanal nasyonal TRT2 . En el ekran la esplendor bien konosida de un maestuozo salon de konsierto, adornado de flores en abondansa. İ, naturalmente, una ancha audiensa sintyendo una vals de Johann Strauss performada por la Orkestra Filarmonika de Vienna.. Lo mas ermozo, un program bivo, dado “en direkto”.
Asigun lo dishimos mas arriva, esto fue una tradisyon ke esta kontinuando desde anyos. La Muzika es “universel”, no deve tener ni nasyonalidad, ni karta d’İdentitad. Este modo pensi sintyendo las notas bolar en el aver…Solo se bive akel momento, sin odio o renkor en el korason…Solo la majiya de la muzika durante una ora o dos…
Si no me yerro, sintimos un konsierto kompuesto enteramente de diversos lavoros komo vals, polka, marcha ets..,todos sinyados de diferentes miembros de la ancha famiya Strauss. Otruna koza ke remarki del primer momento, fue la alegre fizyonomiya del Maestro ansi ke sus mimikas simpatikas. Una kara muy konosida i muy famoza: el ilustro Maestro İsraelyano, el Sr. Daniel Barenboim nasido en Argentina el anyo 1942...
No meldadesh yerrado keridos amigos. El konsierto de muevo anyo 2014, de la Orkestra Filarmonika de Vienna, fue dirijido por un Shefe djudio. Esto parese komo una ironiya, un djugo de la suerte. Muy probavle ke esta semana no pude azer el teksto komemorativo de mi program. Portanto esto sigura ke syertos pasajes de este teksto no mankariyan tambien de evokar tan poko seya, la terrivle trajediya del 20. Siglo.
