“Meter fin a la ambrera” es el titolo de un artikolo muy interesante ansi ke bastante rekonfortante datado del 14/1/ 2014 i sinyado por ‘Yaacov Bar On’, ke meldi la semana pasada en el ‘Jerusalem Post (édition Française)’.
El mos ambeza ke ‘Meir Cohen’ aktual Ministro Israelyano de las kestyones Sosyales, prezentera en poko un raporto sovre la provedad en Israel i sovre los remedyos de luchar kontra eya.
Referandome a mi artikolo muy pesimisto datado del 25/12/2013, me ago un dover de komunikarvos ke poko despues la publikasyon de los shifros alarmantes sovre la provedad de parte de la ONG Latet, Yaacov Bar-On (durante una entrevista ke el tuvo a este sujeto kon el dicho Ministro) resivyo la deklarasyon sigyente:
“La provedad devino un problema nasyonal… En el objetivo de kombatir esta desgrasya, pensi krear un komite independyente enkavesado por el loreato del premyo ‘Israel’ Elie Alalouf, al kual demandi de elaborar un plano de aksyon, ke sera prezentado al Governo.
Durante la epoka ande yo era personalmente Mayor de Dimona, tengo visto ninyos Beduinos ambyertos ke no avian nada komido desde “el pranso de medyodia” del dia presedente. Entonses avia demandado a los Servisyos sosyales de mi Munisipalidad de darme la lista de las famiyas beduinas de las kualas los ninyos no tenian la posivilidad de komer segun sus ambre, famiyas de las kualas en sigida me esforsi de asumir la karga.
Aktualmente, en mi kualidad de Ministro de kestyones sosyales, no puedo permeter ke ayga ninyos ke no resiven bastante nutrisyon… Las Organizasyones No Governomentales (ONG) azen un lavoro admiravle i muy presyozo. Mi objetivo es kel Governo tome las kozas en mano i se karge de esta responsavilidad sin por esto kortar el ayudo a estas valutozas Institusyones.”
A ka kestyon del gazetero: ‘Es ke en el futuro vamos syempre ver personas bushkando en los panires de syerkol?’ Meir Cohen respondyo:
‘No, kon el tyempo este fenomeno va dezapareser kompletamente, ma esto no puedra realizarse de un dia al otro.
Para venser totalmente esta triste situasyon, es antes de todo urjente de entender ke devemos pensar a muestros problemas sosyales mas ke a otras amenazas.’
‘Las palavras del Ministro Meir Cohen’ son simultaneamente realistas i muy pozitivas en la fuerte voluntad ke eyas ekspresan de venser sovre las tyerras de Israel ‘la mizerya de los ke son los mas desmamparados’ kual sea sus orijen.
Topamos ansi el esprito de Humanizmo i de Universalizmo ke son unas de las karakteristikas las mas gloryozas del puevlo djudyo i ke mos vyenen de la epoka Biblika:
“Kuando segaras la rekolta de tu kampo, desharas un pedaso intakto... deshalo para el prove i el estranjero “ (Lev. 19/9-10 ).
“Si un estranjero vyene morar kon ti, sovre tus tyerras, no lo molestaras... el sera para ti komo uno de tus kompatriotos...lo amaras komo ti mizmo” (Lev. 19/33)”
Ande ay ‘kudyo por el otro, voluntad i esforso de mejorear’ ay tambyen Azlaha i Adelantamyento.
