Una ekspozisyon intitulada “El Puevlo, el Livro, la Tyerra” organizada por el Sentro Simon Wiesenthal ansi ke la Embashada del Kanada i syertas otras prestijyozas İnstitusyones, kon tambyen la kolavorasyon de grandes savyos, ke devia tomar lugar Martes el 21/1/2014 en la byen konosida Institusyon UNESCO, fue anulada de parte de Irina Bokova, poko antes la data anunsyada, debasho el preteksto ke esto puedra meter en peligro las negosyasyones de paz en el Oriente Medyo, a la sigida de la opozisyon de un grupo radikal arabo kontraryo a la egzistensya del Estado de Israel.
Esta ekspozisyon tenia komo tema sentral: “La indefektivle relasyon ke el puevlo djudyo tuvo syempre durante su larga historya, kon las tyerras de ande vinyeron sus muy leshanos antepasados antes 3500 anyos i ande fue fundado el primer Estado-Nasyon.
Munchas Organizasyones Djudias kritikaron kon grande amargura esta desizyon de la Direktora de la UNESCO, la kuala kon grande frekuensa es kontrarya al aktual Governo Israelyano.
