Ay problemas ke al pareser son destinados a kedar eternalmente en sospenso i kel benadam no puedra nunka yegar a rezolver, ma sovre los kualos el esprito humano se enfoha de una manera obsesyonal. Es ansi de munchos kavzos ande elementos kontraryos no se topan unikamente en estado de konfrontasyon, ma son mesklados los unos a los otros.
Uno de entre estos kavzos es la konsyensya de la valor inkonmensuravle de la vida, mesklada al drama de una sufriensa fizika insuportavle ke envezes se abate sovre la kriansa humana de una manera irrreversivle.
Munchos payizes akseptan la ‘Eutanazia’ envezes uniko rekorso para enfermidades inkuravles sin posivilidad de remisyon, kavzos ande las ultimas dolores son tanto fuertes ke los sujetos konsernados imploran eyos mizmos piadad de la muerte, otros la refuzan kategorikamente.
Ansi ke kaji todos lo savemos, la ‘eutanazia’ es la muerte absoluta dada de una manera medikal, sovre baza de la desizyon de un konsilyo superyor de doktores irreproshavles en sus saveduria komo tambyen en sus potensyal ethiko, kon el konsentimyento de los paryentes direktos i del sujeto enfermo el mizmo en situasyones de dezespero absoluto.
Ay 12 anyos ke, en su alma i konsyensya, la Beljika aksepto de akordar este ultimo rekonforte a personas aedadas de mas de dodje anyos irremediavlemente kondenadas a sufriir de una manera atros antes de murir.
I la semana pasada el 13 februaro 2014 el parlamento beljikano en su mayoria voto tambyen kon 86 bozes afirmativas, 44 negativas i 12 abstensyones, la mizma ley por ninyos de manko de 12 anyos, kon el konsentimyento byen entendido de una autoridad medikal superyor, ansi ke la akseptasyon de los dos prokreadores i el konsentimyento del sujeto enfermo el mizmo.
Primera kestyon: Es ke un ninyo de manko de dodje anyos puede realizar enteramente lo ke sinyifika la muerte en su akavamyento absoluto de todo modo de reflekso vital ke ayega a un estado de ‘no ser absoluto’?
İ tambyen: Es ke oy, kon el inmenso adelantamyento de la syensya, se puede avlar de ‘una absensya absoluta de esperansa de melezina? Es ke savemos kategorikamente lo ke puedran ser las deskuvyertas medikales de los tyempos a venir?
İgualmente una segunda pregunta: Facha a facha kon el dilemno de la’Eutanazia medikal’ absolutamente limpya de kualkyer elemento kriminal “es ke no ay el espanto de una posivilidad mizmo muy improvable del risko de avrir la puerta a un djenero de ojenizmo al kual kapos de payizes empapados de un dezeo intense de glorya puedran adherar?
İnkontestavlemente ay problemas ke oy en la situasyon aktual de muestro mundo, la kriansa humana es inkapavle de rezolver.
