Segun lo ke meldamos en la prensa, el filmo İsraelyano Bethlehem ke fue prezentado por el Oskar sin malorozamente reushir a obtener este prestijyozo premyo, ma ke por kontra parvino a ser primado en varyos otros konkorsos, es aktualmente el sujeto de una grande kontroversya en Israel mizmo.
Si, esta ovra sinematografika de la kuala uno de los dos senaristos es un Palestinyano, susito una polemika ke parese ser paradoksal entre Gideon Levy editoryalisto djudyo en la afamada gazeta Israelyana Haaretz i el senaristo Ali Waked de relijyon Muzulmana, orijinaryo de los territoryos palestinyanos okupados, el kual afirmo ke el filmo en kestyon es un reflekto muy prechizo de la realidad.
Ansi, el partido de syedra İsraelyana akuza el senaristo Palestinyano de aver eskrito un filmo de propaganda en favor del Estado Hebreo, akuzasyon a la kuala el senaristo riposta ke el punto de vista del filmo no es solo el suyo ma tambyen el de los Palestinyanos eyos mizmos.
La semana pasada la Gazeta elektronika franseza ‘Courrier İnternational’ revino sovre este sujeto dandomos el punto de vista kompleto del dicho senaristo.
Ansyano korrespondyente del sityo Israelyano “Ynet”, Ali Waked paso 10 anyos a azer reportajes sovre la vida i la muerte de Palestinyanos en los territoryos okupados. El bivyo un largo tyempo en los kampos de los refujyados ande se topavan terroristos bushkados, i fue konfrontado a tiros de balas mortales durante la operasyon Rampart del anyo 2002, komo tambyen a reprimandas de parte del Prezidente Mahmud Abbas por sus palavras negativas konsernando la Autoridad Palestinyana.
El estima portanto ke ningun de los reportajes ke el izo en kualidad de korrespondyente del sityo Israelyano “Ynet” da un imajen a este grado egzakto de la realidad Palestinyana kel senaryo ke el ko-eskrivyo por el filmo İsraelyano Bethlehem
El dize “En mi kualidad de djornalisto me kontentava de eskrivir sovre eventos ke konsernava İsraelyanos, i ansi me interesava poko a lo ke se pasava al seno mizmo de la sosyedad palestinyana”.
Komo lo eskrive el djornal elektroniko fransez Courrier İnternational ‘En este senso, para Ali Waked su partisipasyon al filmo Bethlehem ke es su primer senaryo ko-eskrito kon el realizador ‘Yuval Adler’ fue una eksperyensa ke le permetyo de prezentar una vizyon detalyada i sin komplazensya de la vida palestinyana en Sisjordania ande korrupsyon, ekstorsyon, traizyon i luchas intestinas eran omniprezentes a la fin de la segunda İntifada, en 2004 i 2005.
Este filmo no resivyo unikamente elojyos, el fue tambyen blamado espesyalmente por los opozantes al aktual governo Israelyano i (komo fue dicho mas arriva) una de las kritikas las mas fuertes fue la del editoryalisto Gideon Levy ke lo djuzga eskandalozo, pretendyendo ke se trata de una ovra sinematografika de propaganda İsraelyana en la kuala los palestinyanos son invariavlemente prezentados komo los malos, i reproshando igualmente a los autores de ser kobardos i no tener el koraje de tomar pozisyon.
Ali Waked no parese ser muy emosyonado por el atake de su ansyano kolega ke el admira syempre profundamente i se kontento de deklarar “Kuando yo era reporter, konsiderava Gideon Levy komo un Maestro espiritual delkual la manera de lavorar me motivava, ma en el kavzo prezente, su interpretasyon del filmo es totalmente yerrada. Yo no penso ke el filmo ‘Bethlehem’ da un imajen enteramente negativo de tal o tal otro kampo.
En mi kondisyon de Palestinyano, yo no seria kapavle de diabolizar mi propyo puevlo; por egzempyo: en el filmo prezentimos el segundo kapo de la Milisya de brigadas de los Martiryos de Al-Aqsa komo un ombre integro i un ardyente patrioto delkual los aktos envezes muy violentes son motivados por una devosyon a la lucha kontra Israel i no por kavza de kupididad o de kovdisya de poder’.
Ali Waker repeto tambyen ke el punto de vista ekspresado es el de los palestinyanos eyos mizmos i ke este filmo es un reflekto muy prechizo de la realidad. Si Gideon Levy no apresya lo ke vido en el filmo, es puede ser porke el no ama la realidad.
Muestro objetivo es de mostrar la situasyon, no de indikar a los espektadores lo ke deven pensar. Ay munchos filmos sovre este konflikto ke miran de sensibilizar o de azer un korso de moral ; eyos son jeneralmente apresyados por un punyado de intelektuales i tyenen finalmente muy poko impakto..
El senaristo palestinyano no manko de anyadir tambyen: ‘Muestro objetivo no era de trokar la realidad. Esta ovra sinematografika tuvo una ancha odiensa i esta susitando un debate en Israel. Si el puedra permeter a syertas personas de entender ke(İsraelyanos komo Palestinyanos) mos topamos engajados en una situasyon de la kuala vamos salir todos pedrientes i ke las kozas deven trokar, entonses solo, yo puedre dezir ke es una reushita’’.
Ansi fue la repuesta de un Palestinyano al pesimizmo İsraelyano.
