El futuro del mundo segun un teksto de Sami Aji

Meldi kon grande  interes el artikolo de Sami Aji, publikado en el Şalom de la semana pasada, el kual mos yeva leshos adelantre en el tyempo, 100 anyos mas tadre kel dia de oy.

Kon su ancha kultura jeneral, su vivasidad de esprito i su lojika byen rezya, Sami Aji (bazandose sovre el ritmo i la kualidad de las deskuvyertas  medikales, syentifikas i teknolojikas realizadas los ultimos 100 anyos) ekstrapolo i mos dyo una vizyon muy plauzivle de lo ke puedra ser la situasyon del mundo i de la humanidad en el anyo 2114; de mezmo, el mos avlo de lo ke puedran ser los muevos adelantamyentos a esta data leshana ke pokos de entre los lektores i eskritores  aktuales puedran ver.

Aunke bazada simplemente sovre deduksyones individuales, la ekstrapolasyon de Sami Aji kontyene una grande koezyon lojika i muy realista...

Si... kon los progresos vizivles de la medikeria en  los espasyos del diagnostiko, de la shirurjia i de los medyos kurativos, komo tambyen los muevos remedyos profilaktikos, se puede fasilmente imajinar i mizmo afirmar ke la esperansa de vida de la kriansa humana en jeneral, sera de mas de 90 anyos, en un estado de  salud relativamente buena i de perfekta konsyensya de sus aktos i palavras.

Se puede de mezmo formular la mizma koza konsernando las supozisyones de Sami Aji al sujeto de la komunikasyon verbal o por eskrito entre personas ke se topan a miles de kilometros de distansya las unas de las otras (lo ke oy mizmo ya esta en estado de adelantamyento vizivle) i igualmente por los medyos de desplasamyento fiziko de los humanos sovre la superfisia terresta .

De otra parte, komo se puede preveer fasilmente, la populasyon mundyal va pujar en konsekuensa i entonses surjira el problema de “la alimentasyon “i “del alojamyento”.

A este propozito muestro amigo dize ke ‘los esforsos ke se estan azyendo aktualmente i los rezultados ke se estan obtenyendo’ permeten de pensar ke progresivamente ‘el menester de superfisia de tyerra nesesarya a la produksyon agrikol mundyal’ devyene de dia en dia mas chiko grasyas a una madurasyon de mas a mas rapida de los produktos sembrados, lo ke permete en munchos kavzos de obtener dos o tres rekoltas kada anyo al lugar de una sola, fakto ke puedra asegurar  fasilmente la alimentasyon a una mas grande populasyon  i tambyen liberar vastos terrenos ke serviran a la konstruksyones de nombrozas fraguas destinadas al habitat.

Konsernando el menester de mas a mas grande de agua potavle, el problema puedra ser rezolvido grasyas a la utilizasyon de una parte de la humididad  ke se topa en la atmosfera. ets...ets..

Esto todo puedra por seguro ser realizado tanto ke la syensya kontinuara a desveloparse. Ansi, komo konkluzyon Sami Aji disho lo sigyente  ke me ago el dever de traduzir , si no literalmente a lo menos aproksimativamente:

“...En azyendo todas las supozisyones mensyonadas mas arriva, el hipoteziz al kual me referi prinsipalmente es el prinsipyo de  ‘libertad de pensamyento i de refleksyon individual’. Todo el tyempo ke esta libertad egzistara, niguna desgrasya natural puedra impedir este adelantamyento.

Por kontra si undimos el meoyo de muestra manseves (lakuala konstitue el elemento i la garansia el mas seguro del  futuro) en una meskla de tabus, kreensas, supersistyones i tradisyones arkaikas de las kualas ninguno konose el orijen, es kaji seguro ke vamos entrar en un periodo de terrivle obskurantizmo.”

Puedemos insistir, mozotros lektores, ke en efekto un esforso de ‘mas grande madurasyon del esprito humano’ devra ser echo a la dimensyon mundyal. La intelijensya i el dono kreativo  no son propyos  a una sola partida de la humanidad, eyos egzisten de una manera igual en todos los puevlos, kuala seya la fey de kada uno de entre eyos... En el pasado, la Gresya antigua desvelopo  el Rasyonalismo kon el filozofo Aristoteles... El Aljebre (baza de los kalkolos ke avren la puerta a varyas deskuvyertas syentifikas) fue inventado de parte de los Arabos ...La sivilizasyon Kristyana introduzyo el amor del arte en su totalidad... La vertud de la meditasyon entro en muestra vida koryente grasyas al Budizmo... İ el ‘Universalizmo de la Etika’ grasyas al Djudaizmo..ets...ets...

Si... kada relijyon tyene una koza a dar. Se trata aktualmente de tener todos en djunto un objetivo komun de humanizmo i de remplasar las armas por livros, de avrir muevas eskolas i no (komo lo dize Sami Aji) de destruir las ke ya egzisten i de partisipar al esforso de progreso, kuala sea la kapasidad de kada uno.