Ladinokomunita (LK)
Kon el No.109 de “El Amaneser” estamos selebrando otrun aniversaryo i ampesando a muestro 10en anyo. Munchos i Buenos… En este mizmo E.A, el lektor va topar mi artikolo sovre el 8 Marso. Oy estamos kontinuando al sujeto ke ampesimos la semana pasada.
Aserkandomos de las fyestas, kualo mas ermozo ke avlar de amistad. Un pensador dize: “La Amistad no es komerse de parte a parte, es tener ambre endjuntos”. Punto de vista ke respekto.Yo kero adjustar: “Es tambien alegrarse endjuntos, atristarse endjunto. “Mis sinseros suetos de buena salud al Prof. Sephiha, espero ke va rekovrar en kurto tyempo”.
Tornaremos al presipyo de 2000, mis primeros pasos en esta pajina. No saviya dayinda uzar una komputadera, me paresiya koza difisil!!. Embiyava mis eskritas de manera kaji primitiva, kon fax. Las amigas del “dizgi” teniyan de eskrivirlas otruna vez. Vide ke no va kaminar ansi, me ambezi, a lo menos syertas yaves elementaryas del computer. Ampesi a sintir el byervo ladinokomunita i el nombre de Rachel Amado Bortnick, fondadera del forum.
En el 2003, en su viyaje a Estambol, Rachel vijito el Şalom i la konosi myentres una reunyon ande, konosi tambien Güler Orgun… Rachel i Güler ke ivan devenir dos buenas amigas miyas. En el 2007, meldi en “El Amaneser” un teksto de Rachel titulado “Sujeto Neglijado: Los Sefaradim en la Shoa”. Era un dokumentaryo importante ke devriya ser meldado por mas munchos lektores. Kon el akordo de Rachel lo tresladi al turko i se publiko en el Şalom.
En el Junyo del 2008, vino a Estambol un grupo de miembros del LK. Tuvimos la oportunidad de konoser de serka amigas, amigos ke konosiyamos a traverso sus mesajes. En un Otel de Taksim, el Alhad de Shavuot, un emosyonante enkontro kon los ke vinyeron de las kuatro partes del mundo. Estados Unidos, Uruguay, Espanya, Brazil, Australia, Israel. Naturalmente i miembros de Estambol komo muestras amigas Güler Orgun, Eliz Gatenyo, Esti Saul i otros.
Me izo un plazer imenso de toparme de muevo kon Rachel Bortnick. Al myerkoles, el grupo vijito el Şalom. Las paredes, asta akel diya nunka sinteriyan tantas konversasyones meskladas kon inglez, turko, ebreo i varios dialektos del espanyol. A un momento, ampesimos a avlar Judeo-Espanyol asigun el dezeo komun del grupo. La lingua es una de las valores prinsipalas ke mos ata en este Ponte de Amistad.
En separandamos Rachel me dyo el CD “Trees Cry for Rain: A Sephardic Journey” Arvoles yoran por luvya: Un viyaje Sefaradi. Es un dokumentaryo de 35 minutos ralizado en inglez el 1988. Este filmo de kurto metraje se amostro en munchos festivales enternasyonal de Filmo. 10 anyos despues, en 2008 se difuzo, adjustando el treslado judeo-espanyol, ke tengo i yo.
De vez en kuando embiyo mesajes a LK, ma no so miembro. Portanto me syento komo tala, sovre todo los anyos sigiendo la aparisyon de “El Amaneser”, kuando ampesi a meldar munchos mesajes konsernandome. No lo esto dizyendo por alavarme ma, solamente por ekspresar el sentimiento rekonfortante de tener amigos. Espesyalmente en el Otonyo 2008, despues del aksidente ke pasi. Akeyos diyas difisil resivi un montante de mesajes ke me dyeron apoyo i fuersa moral. Pensi ke, reelmente se aviya fraguado un Ponte de Amistad. De ande estava espandida eskrivi un artikolo kon el mizmo titolo del ke estash meldando.
Aki kero relatar un fakto ke tiene grande sinyifikasyon para mi. Rosina Karako (de b.m), meldando mis rekuerdos en “El Amaneser”, remarko ke mos engrandesimos en el mizmo distrikto de Galata, en “El Kal de los Frankos, (Laleli Cheshme). No me olvido su mesaje nostaljiko ke diziya:
“Kerida Coya, mi marido me va demandando, en desparte de LK, deke no tengo amigas de chikes, amigas ke se eskriven letras, mas personal, mas entim?”…
Konosiya sus amigitas de chikes, las topi. Ma, dinguna se akodro de Rosina. Esto me izo mal… En kurto keridos lektores, demandi a Rosina su adreso de Florida. Ampesimos a korresponder a la manera vyeja, kon posta…Eya me demandava tal o tal lugar, tala persona ke se izyeron? Yo le respondiya.Tyempos guadri las letras de esta chika de Galata ke konosi mezo Ladinokomunita… Es verdad, todos mos olvidimos de eskrivir letras.
No aviya pensado de azer un teksto de sentimiento intenso. Asigun estash vyendo keridos amigos, “La Amistad no es solo ambrearse endjuntos, es alegrarse i atristarse tambien endjuntos”.. Vos sueto diyas de fyestas alegres.
