En el Kalendaryo Ebraiko el mez de Adar tiene un lugar partikolar. Adar es el sejen mez, a partir de Roshashana (Tishri). Konsiderandolo a partir de la salida de Misraim (Nisan), es el dodjen mez. Adar, komo la mayoriya de los mezes Ebreos, tiene un orijen Babilonyano sinyifikando granero. Se aparejan los kampos para la sembradura i syendo el ultimo mez del invyerno sinyifika tambien: ennuvlado i eskuro. Ma, puedemos dizir ke oganyo pasimos este mez en una atmosfera kaji de primavera, kon diyas klaros.
En Adar, espesyalmente en Yerushalayim, se enkasava los shekalim para el Sanktuaryo, kon el buto de merkar ofrendas publikas i otros menesteres. Tambien en Adar, afin de aprontar para los pelegrinos o vizitores de Pesah, se reparava los kaminos, las kayes, las fuentes danyados kon las luvyas del invyerno. Dizen ke kuando vyene Adar puja la alegriya. En este mez se kumplieron maraviyas para el puevlo Djudio. El miraklo de Purim ke fyestamos en Adar, es uno de estos… En el 13 de Adar es el Taanit Ester. “Andad i arrekojed todos los djudios ke estan en Shushan i azed taanit vozotros por mi. Yo i mi donzeyas azeremos taanit de mezmo”. (Livro de Ester: 4:16). Shushan era la kapitala del İmperio Persano.
Keridos lektores, komo lo savesh, el anyo 5774 es un anyo emboliko, Tenemos (o tuvimos diremos) Adar i Veadar. Oganyo la fyesta de Purim se selebro el 14 de Veadar (Diya de Alhad 16 Marso). Bazikamente el kalendaryo Ebraiko es “Lunar”, akordandose kon el torno de la Luna al doredor de la Tyerra. Este torno se kompleta kaji en 29,5 diyas, dunke 354 diyas en 12 mezes, lo ke sinyifika 11-12 diyas menos ke el kalendaryo solar. 29,5x12=354. Por dar un egzempyo, oganyo, anyo 5774 kon el mez de Veadar, tenemos 13 mezes donde, 5 mezes de 29 diyas i 8 mezes de 30 diyas.
Para adaptar el anyo lunar al anyo solar, los savyos al presipyo adjustavan periodikamente un sigundo mez de Adar. El eskopo de esto era konservar el mez entre Purim i Pesah i azer koensidar la fyesta de Pesah en la Primavera, ansi ke las otras fyestas Djudias en las sezones ke konvenia. Despues este “dekalaje” se estableso definitivamente en un siklo ke se renovela en kada 19 anyos. Se interkalo en el entervalo de estos 19 anyos, 7 vezes un 13en mez adisyonal ke es el Veadar. De esta manera, los 19 anyos korresponden a los 228 mezes del kalendaryo solar. 19x12=228.
A primera vista parese komo un problema komplikado, difisil a solver o entender. Fue egzaktamente mi idea kuando lo aviya meldado antes munchos anyos. İ me akodro aver tomado kreyon i papel para azer el heshbon!! Devo atorgar ke, todo en savyendo desde anyos la egzistensya del mez doble de Adar, fue en mi maturidad ke me enteresi a konoser la razon. İ fue ansi ke realizi ke no ay edad para ambezar. Portanto, en vezes tengo syertas ezitasyones kuando transmeto lo ke meldo o lo ke me ambezo. Syempre ago mi posivle para no azer yerros. Espero ke, en este espasyo limitado mis eksplikasyones fueron bastante klaras.
En el final de este “dulse moabet de Purim”, kero relatar un pasaje del teksto de L. Koppelman Ross ke meldi antes unos, kuantos anyos. Esta eksplikando komo la İstoria de Purim puede ser un buen giador para los ke biven en la Diaspora. Ansi: “…El livro de Ester mos amostra klaramente ke no es nesesaryo de abandonar el Judaismo para progresar en kualkyer domeno, afilu politiko. Se puede ser un buen sudito leal todo en syendo i un buen djudio”.
Ayegados para kada anyo, keridos lektores…
