‘Los Kibbutzim’

“Simbolo del sosyalizmo sionisto, el Kibbutz es uno de los mas grandes inventos İsraelyanos” mos dize Milka Kahn en un artikolo ke fue publikado la semana pasada en el “Jerusalem Post (édition française).”

La eskritora tyene provablemente razon, ma aktualmente mos topamos en una epoka ande todo esta en perpetual  movimyento i ande las kozas pueden trokar de un dia al otro. Por esta razon, una kestyon mos vyene al tino: ‘Eske este sistema de koabitasyon i  de lavoro kolektivo ande no entra el interes personal, puede realmente persistir en su integralidad?’

La repuesta es difisil a formular, ma deke no responder afirmativamente ? Al empesijo, este sistema  karakterizava  los prinsipyos de baza  de İsrael, deke ke no sea tambyen oy?

 Tuve entonses la idea de azer a este sujeto  una chika bushkida historika en  varyos artikolos publikados en la prensa ansi ke en el ‘Web’. El rezultado parsyal ke pude obtener es mas o menos el sigyente:

Komo por seguro munchos de muestros lektores ya lo saven, el ‘kibbutz Kinneret’ fue el primer, kreado al empesijo del Venten siglo en el anyo 1910.

Sus raizes se topan en el partido Hapoel Hatzair, el mizmo influensado por el sosyalizmo populisto ruso. Uno de sus fundadores fue Aharon David Gordon kon su ideal anti-industrial i anti-otoritaryo.

Los myembros de este Kibbutz dezeavan krear un modelo sosyal ke  poko a poko puedra influensar i rekojer la totalidad de los djudyos ke bivian en  Palestina a esta epoka, afin de formar “una sosyeta mueva ke  puedra asegurar su mantenimyento kon los produktos obtenidos de la tyerra grasyas a su propyo lavoro  i al respekto absoluto del entorno”.

Poko despues de aver obtenido esta primera informasyon, meldi tambyen kaji la mizma koza en un otro artikolo konsernando esta vez el Kibboutz relijyozo ‘Sde Eliyaho’ fundado en 1939 en el Norte del Yordan por un grupo de mansevos relijyozos orijinaryos de Almanya ke avian fuyido de la amenaza nazi, kibbutz muy inovante en el espasyo de la agrikultura biolojika i ke tyene syempre, mizmo oy, el dezeo de aumentar la kuantidad de su produksyon sin utilizar insektisides.

En el anyo 1941, Maryo Levi (uno de los  vyejos myembros aktualmente en vida de este Kibbutz) avia estudyado la agronomia en la eskola ‘Mikve Israel’ serka de Holon. Ansi, konsiderado komo un eksperto a este sujeto, el fue entonses dezinyado a dirijir el departamento de  kulturas agrikoles, un posto ke era totalmente konforme a sus aspirasyones.

Maryo Levi dezeo syempre lavorar la tyerra todo en prezervando el entorno grasyas a su refuzo kategoriko de utilizar ‘pestisides’ konsiderados (mizmo oy) ser toksikos para el Ombre i ke el remplaso kon una meskla de varyas yervas i otros produktos naturales. 

En desparte de esto, aktualmente Sde Eliyahou figura entre los 50 kibbutzim I moshavim ke ainda funksyonan en İsrael  konformamente al vyejo modelo kolektivo.

Tres vezes al dia sus 260 myembros (espartidos en 160 chikas kazas ) pransean syempre endjuntos en la sala de komer. Tambyen komo todos los myembros son relijyozos ke kreen en las valores espirituales, una sinagoga moderna fue fraguada .

Ansi, esta institusyon kontenta todos los menesteres de sus myembros: satisfaksyon espiritual, alojamyento, komanya, vestimyenta, kudyos medikos i edukasyon kolektiva de los ninyos… De mezmo, lo ke es un punto muy karakteristiko de un semejante sistema, el direktor resive el mizmo salaryo ke la persona ke aze el fregado en la kozina .

En1974, este Kibbutz devino  uno de los pioneros de la Agrikultura Biolojika, i a la sigida de una larga lucha, parvino a konvenser tambyen otros agrikultores i a interesar el Ministeryo de la Agrikultura de la epoka, el kual entendyo immedyatamente el grande avantaje de los metodos integralmente naturales ke puedian ser una alternativa muy interesante a la utilizasyon de produktos  peligrozos para el ombre.

Esto dicho, es verdad ke (komo lo afirman syertos komentadores) desde los anyos 1980 muevas valores, esta vez individuales i familyales, se desveloparon gradualmente en munchos otros Kibbutzim sin danyar profundamente los prinsipyos de baza del kolektivizmo i del igualitarizmo sosyal.

El pranso de medyo dia es syempre kolektivo, ma el de la noche devino individual o familyal, los ninyos biven kada uno kon sus propyos paryentes; tambyen la industrializasyon entro en munchas de estas institusyones, lado kon lado kon la agrikultura, lo ke nesesita munchas vezes la intruzyon de lavorantes ajenos por la mas parte migrantes.

De mezmo, aktualmente nombrozos myembros de algunos Kibbutzim lavoran ahuera en otros kompleksos industriales. 

Por seguro estas todas modifikasyones desfavorizan  el absolutizmo de syertos prinsipyos fundamentales sin por esto prejudisyar totalmente el konsepto de baza del  kibbutz ke es el komunitarizmo.

Oy, mizmo en Tel-Aviv, egziste un paradizyo ande se sembra varyas vedruras, yervas aromatikas, lechugas byen yenas ets…ets…sovre el tejado de una  vyeja fragua kaji en ruvina, situada en la  kaleja Zvulun.

Esta guerta fue fundada por Ofir Brom i İyar Semel, rezidentes del immoble. “Muestra komunidad se yama “El trivo” “dize İyar Semel, kijimos azer un djenero de kibbutz urbano…un refujyo de paz i de libertad.

Estos espasyos vedres komunitaryos sovre tejados de vyejas fraguas  pujan de mas a mas en la grande sivdad İsraelyana, ande 15 a 20 vezinos komunikan entre eyos i se okupan aktivamente del  desvelopamyento de los produktos sembrados. La eksplotasyon agrikola ke se topa en el tejado de sus morada asegura 20% de sus menesteres alimentaryos en legumbres, lo ke es un grande ayudo para el budjeto.

El espasyo agrikolo ‘Zvulun Balagan’ vende una partida de sus produktos a una kliantela de mas a mas ancha, ke le raporta un buen revinido. İ kuando el tyempo lo permete, nochadas debaldes de sinema i de korsos de YOGA son organizadas.

Segun syertos partisipantes, las valores sionistas intensifikan estos proyektos kreativos i aseguran una solidaridad resiproka entre varyos  sivdadinos.