En la Torre de David, entre las murayas vyejas, tuve el mazal de admirar las enstalasyones de Dale Chihuly, monumentos kompozados de vidros de kolores a kolores. El artisto eskojo Yerushalayim para ekspozar su arte i resivir el Milenaryo en arrelumbrando el sentro del mundo.
Dale Chihuly nasyo en 1941 en Tacoma i se enstalo en Seattle, Washingtom. Es uno de los mas grandes artistos de soplar vidro (glass-artist) del siglo XX. Chihuly supo transformar este arte en el kampo de la eskulptura kon posibilidades sin limites. Djunto kon sus kreasyones jiganteskas, toman lugar tambyen estatuas i objektos dekorativos. La mas importante de sus ekspozisyones, la de la Torre de David, es espesyalmente en omenaje a esta luminoza Tyerra Santa. Si se pensa ke este Arte se desvelopo antes 2000 anyos al Este del Mediterraneo, se puede krear una relasyon entre el pasado, el prezente i el avenir.
Chihuly aksentua ke el vidro es abundante, fasil de formar, mas duravle ke munchos otros materyales i probablemente egzistera mas largo tyempo.
Chihuly realizo sus projektos en diferentes payises: en los kanales de Venezia, en la Isla Nijima de Japon, en Norvejya, Meksiko i munchos otros lugares del mundo. El sensyo de esta ekspozisyon, el artisto mo lo konta ansi: “Para dar a gozar i azer plazer a la umanidad. Para resivir el Milenaryo, no ay mijor lugar ke Yerushalayim, sivdad de la antiguedad. Kon su luz tan partikolar, es el lugar de multi-kulturas. El reenkontro del pasado kon el muevo. Kon su tekstura, es una de las mas rikas sivdades del mundo.”
- En ke manera se preparo el artisto para su ekspozisyon:
Para este projekto, la kantidad de vidro i sus dimensyones eran tan grandes ke solo algunos se prepararon en Seattle, en su studyo. Los elementos kompozando sus ovras, sigun las direktivas I eskizas de Chahuly, fueron realizadas por diferentes fabrikas en los payises komo Fransya, Finlandya, Chekoslovakya i Japon. Se transferaron a Israel kon 12 konteyneres, 10,000 pedasos i 42 tonas de vidro. Estos se enstalaron kon soportes grandes de metal konstruidos para montarlos.
“La Torre Blu” es formada de 2000 pedasos de vidro i mezura 13.5 m de altor.
“La Montanya de Kristal” montada kon mas de 4 km de metal, es alta de 9.5 m i se kompoza de 1500 kristales. Para realizarlo lavoraron 30 personas de su studyo kon 20 otras ke se adjuntaron a eyos.
Estos vidros reflektando en el diya el sol i en la noche briyando kon la luz, me izyeron pensar a la Biblya ke dize: “Sea la luz; i fue la luz.”
- Munchas grasyas a Dale Chahuly. Le dezeamos kamimos klaros syempre.
