La falta de amor (sevgisizlik), el egoismo es una hazinura ke derroka (tahrip etmek) avagar avagar el puerpo de la persona. En primero puedemos sintir (hissetmek) una soledad en el korason, una enkyetud (huzursuzluk), un malor (mutsuzluk), un espanto, una ravya (öfke), stres, depresyon, un selo i munchos otros sentimyentos (his) negativos.
Una amor, una kerensya kontinual, ekilibrado i deçidido (kararlı) es muy emportantepara engrandeser una kriyatura kon sanedad. Tener konfiensa al den frente nase en el doredor (ortam) de la kerensya ekilibrado.
Me akodri de una dicha de “Rochefoucauld”.
“En kada edad la persona es komo una kriyatura. Su kavesa syempre bushka un kavesal de kerensya”.
La kerensya verdadera parese a la luz ke se propaja (yayılmak). Es komo el sol ke aklara lo bueno de lo negro, lo djusto del indjusto. La kerensya es una valor (değer) ke no va trokar nunka en el mundo. Kale saver dar la amor al den frente.
La kerensya es komo la saveduria (bilgi). No se termina en dandola, ni en partajandola. Vos kero dizir keridos lektores; la kavza de eskrivir este sujeto.
Oy fue un alhad muy reushido para mi i mi kerido marido, porke asistimos al teatro ‘Müziksiz Evin Konukları’ (Los Envitados de la kaza sin Muzika) ke fue traduizido i dirijado por ‘Nedim Saban’; el artisto (sanatçı) konosido i famozo de muestra komunitad.
“Neil Simon” eskrivyo esta pyesa en el anyo 1990, ke se djugo en Broadway i en Londra i en el mundo entero. En el anyo 1991 gano el ‘Premyo de Pulitzer’ (Pulitzer ödülü).
El sujeto de este djugo: Un padre ke peryo su echo i tyene devdas, yeva a sus dos ijos a la kaza de su madre ke es una mujer sin kerensya. A parte tyene i una ermana ke se komporta komo una kriyatura. vimos las relasyones familyales kon los pletos (çatışma) entre las jenerasyones diferentes.
Un djugo maraviyozo triste i komik en dando munchos mesajes sovre la kerensya. Los sentimyentos de amor, de piadad (acıma), de proteksyon i de apatronarse (sahiplenme), las relasyones de kerensya ke se peryeron en la lucha (mücadele) de la vida fue lo prensipal del sujeto.
Riyimos i yorimos en mizmo tyempo. “Nedim Saban” dirijo este djugo kon grande reushitad en topando los artistos talentuozos (yetenekli).
Es un djugo de Soledad i de Rezistensya (direniş) de Kerensya. El eskrivano “Neil Simon” mesklo la komedia i la tristeza (hüzün) kon fineza i Nedim Saban lo dirijo kon grande kapachitad. El izo ganar esta pyesa a la lingua turka en traduisandola del ingles.
Kero felisitar ‘Nedim SABAN’ por su performensia i su perseverensya ke tyene por el teatro i otras aktivitades artistikas (sanatsal). Esta kontinuando al lavoro de teatro komo eskritor, aktor, produktor i direktor. Reushitad al produktor N.Saban en su ovra sakra.
