Pesah

Pesah alegre a todos los lektores i partisipantes aktivos del Şalom, Pesah empapado de rizas i kantes ansi ke de kerensya i komprensyon mutual.

Lunes la noche en kaji todas las kazas djudias, la famiya sera reunida al torno de la meza paskual  sovre la kuala se toparan el ‘plato de los dinim‘ i las 6 shemurot embrujadas en un sako de lino brodado kon fervor; los vazos seran yenos de vino i munchas vezes  amigos asolados seran kombidados para una larga nochada de rekuerdos, kestyones, repuestas i kantes antiguos ke mos yevaran leshos en el pasado i en mizmo tyempo mos avriran la puerta de un futuro ke todos dezeamos ser yeno de paz, kontentes i amistad. 

 Pessah es antes de todo la komemorasyon de la salida de Ayifto de un puevlo esklavo ke tuvo el koraje de akseptar (al presyo de multiples difikultades i sufriensas) la insertidumbre de un  egzodo al pareser interminavle, komo un largo enkaminamyento en direksyon de la libertad ke ekspresa el ermozo orgolyo i el inmenso dezeo de estos ombres i mujeres de ser enfin “humanos independyentes en sus refuzo de syempre abokar la kavesa delantre el enemigo”.

Munchos livros mos kontan los dolorozos esforsos ke eyos tuvyeron a azer durante sus  estadia en el dezyerto, los ojos kontinualmente fiksos sovre el  movimyento de las nuves en el syelo, afin de topar eyos mizmos el kamino a sigir.

De mezmo, Pesah mos anunsya el tyempo de rekojer lo sembrado, lo ke es el endisyo de una populasyon ke (malgado su destino de ser un punyado de humanos en kontinual migrasyon) tenia syempre en eya mizma ‘el eskarinyo intenso i la vokasyon de devinir una ‘Nasyon estavle’ sovre una Tyerra ke sera la Suya.

La sia al torno de la meza familyal ke muestros ansestros deshavan inokupada asperando la venida del profeta Eliau i la puerta de la kaye ke kedava medya avyerta para el pasante ke kereria entrar i paskuar kon eyos, ekspresan el ovligo de solidaridad i de hospitalidad entre todos los myembros del puevlo djudyo.

Si… la fyesta de Pesah es sin dubyo esto todo, i tambyen (lo ke es muy importante) el rekuerdo ke durante los 40 anyos de soledad en el dezyerto, muestros primeros aguelos resivyeron de la mano de sus giador Moshe Rabbenu un kodigo en mizmo tyempo relijyozo i etiko-sosyal ‘El Dekalogo’, los dyez komandamyentos ke afirman muestros doveres no solo en direksyon de Dyo ma igualmente en direksyon de kualkyer kriansa humana kuala sea su Fey, lo ke mos konfirma la Biblia kon su kodigo de los ‘Syete komandamyentos de Noah’ destinado partikularmente a los ke no son djudyos afin de indikar ke ‘todos los ke lo observaran’ seran syempre konsiderados komo djustos entre los djustos, todo komo los djudyos ke observaran las preskripsyones del Dekalogo. 

Pesah alegre keridos amigo.