PESAH es es la fyesta la mas grande de los Ebreos, i se fyesta al 15 nisan durante 7 dias, a la memorya de la salvasyon de los İjos d’İsrael del esklavaje Ejipsyano.
Pesah es el sembol de la lucha (mücadele) de la liberasyon (kurtuluş) i de la independensya (bağımsızlık) por la Nasyon İsraelyana i tambyen por todas las kulturas del mundo.
Pesah es la fyesta de “Matsot”.
La seremoniya de la noche de Pesah ke es meldar la “Agada” en el doredor de una meza kon toda la famiya endjuntos; de una parte mos aze akodrar la istorya djudiya, i de otra parte mos aze akodrar las valores (değer) de la libertad, la onor, la dinyita (onur) de la umanitad, sin olvidar estas valores ke no mos puedemos esvachear (vazgeçmek) nunka.
A la salidura de Pesah ke sera amanyana la noche, kero partajar kon vozotros keridos lektores un pasaje mirakulozo ke meldi en una revista istorika yena de refleksyones de savyos i pasajes enteresantes.
Entremientes “Hag Pesah” Sameah, i el Dyo ke mos ayege para kada anyo kon todos endjuntos, pujados i non aminguados.
El Pan Amasado Kon Tosigo
Fakto pasado en PRAG en el tyempo ke bivia el Gran Rabino nombrado “Ribi Yeheskel” de Prag.
Prag era una de las sivdades la mas muchedumbre (kalabalık) de ijos de Yisrael, los kualos eran amorozos por sus relijyon i tambyen de Dyo. Era de uzansa en esta sivdad, el dia ke saliyan de Pesah, de komer pan kozido de orneros non djudyos, malgrado ke todo el anyo los orneros djudyos ya abastesian de furnisir pan para toda la populasyon djudia. Solamente este dia les era emposivle de amasar pan para todos los moradores, por esto permetyeron los rabinos de komer pan de orneros non djudyos, el dia de despues de Pesah.
Un anyo, les paso por la idea de entre los orneros goyes, de azer fin kon el puevlo de Dyo: Ke izyeron? Se adjuntaron todos los orneros i desidaron entre eyos de meter tosigo aryento la masa de pan, afin ke mueran todos los djudyos moradores de Prag en un dia, eyos se metyeron de akordo, i la koza kedo en sekreto.
El Kriador del mundo ke no durme ni adurmese guadrador de Yisrael, en la noche syetena de Pesah le aze ver un esfuenyo a ribi Yeheskel de Prag. Un vyejo se le aparesia i le dizia: “Yeheskel, Yeheskel, ke sepas ke los orneros metyeron tosigo en el pan ke estan amasando para los djudyos”. Enkantado i trublado se esperta, ke en vista se durme. De nuevo akel vyejo en el esfuenyo se le aparese i le dize: “mira Yeheskel si tu no te enteresas para salvar a mis ijos, sus sangres de tu mano se van a demandar.” A la manyana keda pensando Ribi Yeheskel komo el se deve rijirse. Disho entre si; “no es djusto de publikarlo este sujeto. Ke si lo supyeron los orneros, eyos van a kemar todo akel pan i van aprontar otro, i despues me van a akuzar ke les echi kalomnia (iftira) sovre eyos”.
El rabino se rijyo kon muncha prudensya, konbido (davet etmek) a su kaza a todos los rabinos de la sivdad i no les avlo a eyos del todo de lo ke el se sonyo.
Eyos despues de aprofondesersen en el estudyo teolojiko (ilahiyat), disho ribi Yeheskel a los asistentes: “Tengo una rogativa (dilek, rica) de todos vozotros i ke esto konvensido ke no me vaj a kontradizir i es:
Me topo en el ovligo de proklamar manyana en toda la sivdad a nombre de “Bet Din” por este anyo ke la Fyesta de Pesah va ser 9 dias. Ke no vos venga estranyo (tuhaf), mi dezeo es ke tengash konfiensa en mis palavras porke no vos puedo dar munchos detalyos, kero absulutamente ke konfirmej a mis palavras afin ke todo el puevlo se krean. Todos aunados le akseptaron porke ya savian ke todos sus pensamyentos eran por el entereso de la nasyon.
Al ochen dia de Pesah, enkomendo el rabino de serrar todas las Keilot i Midrashim ke egzistian en la sivdad, i ke solamente la keila grande sera avyerta, i ke todos vengan a orasyonar aya.
Los administradores de la komunitad se rijeron sigun el ordeno del Rav. El templo era yeno asta la kaye de ombres, mujeres i kriaturas. Myentres la orasyon de la manyana, en ora ke yevavan el Sefer Tora al Ehal Akodesh, alevanto la boz el rav Yeheskel i detuvo a toda la asistensya de orasyonar i disho: “Mis ermanos, los Rabinos del Bet-Din i yo desidimos; de no komer este anyo Hamets en el nueven dia de Pesah. Komo todas las leyes de los dias de Pesah, ansi vaj a azer en el nueven dia, i todo el ke kome este dia hamets, es komo ke komyera el primer dia, i es kontado en los pekadores de Yisrael”. El rabino termino de avlar, tomaron la palavra todos los otros rabinos ke konfirmaron a sus palavras. Los djudyos moradores de Prag resivyeron sovre eyos de azer el komando de sus pastores.
Al dia los orneros se meten uno allado de otro en la kaye de los djudyos, para vender sus pan. Ma ven kon enkanto ke ninguno se aserka a eyos. En pasando uno de los djudyos les demandan: deke no merkaj el pan ke vos trushimos) Les responde : Nos es defendido de komer hamets oy.
- Por kuala razon, oy no es nueven dia?
- Si, ma nuestro rabino nos ordeno de fyestar este anyo 9 dias.
- Es ke todas las sivdades estan fiestando komo vozotros?
- No, respondyo el djudyo : solamente nuestra sivdad, el resto de los paizes oy estan komyendo hamets.
Los orneros ravyozos de esta desizyon del rabino, se fueron i se kesharon a la polisia, akuzando al rabino de averles sido la kavza de una grande pedrita. Les responde el grande de la polisia, ke eyos no se pueden mesklar, syendo ke el rabino es el pastor de los djudyos, i sigun les dikta sus leyes se rijen. Ma los orneros se keshan, ke eyos furnisen kada anyo el pan de despues de Pesah, i si devia aver algun trokamyento kalia avizarles de antes. Este kavzo se dyo al djuzgo, ke se desidyo ke el rabino deve pagar todo sus danyos.
Akel dia mezmo el djuzgador enbio a yamar al rabino, i le avizo de las keshidas de los orneros i la desizyon del djuzgo; ke el es ovligado de pagar toda la kontra valor de los panes.
- Esto pronto a pagar disho el rabino, solamente kero saver el pasto del pan i la kualidad, puede ser ke no es konvenivle para dar a komer mezmo a un perro.
Por esto keria ke trusheran aki todos los panes, i uno de eyos de dar a komer a un perro, si no ay en el pan ninguna mankura, los vo tomar i vo pagarles sigun valen.
El djuzgador ordeno de traer un perro, i le dyeron de akel pan i komyo. Apenas el tosigo empeso azer su efeto ke kayo en basho i muryo delantre de eyos. En vyendo los djuzgadores este evenemento, tomaron panes de kada ornero, i se topo ke todos eran amasados kon tosigo.
En vista se dyo orden de aprezar a todos akeos orneros, i el rav salyo libero sin pagar nada. El djuzgador kuryozo de todo este misteryo demanda del rav komo supo este sekreto. El rabino le konta ke de los syelos se lo avizaron por esfuenyo, i fue ovligado de ordenar este Pesah 9 dias.
Una desizyon fue dada de parte los djuzgadores, de azer a los orneros lo ke eyos pensaron azer a los djudyos. I les dyeron a eyos de akel pan i komyeron i muryeron.
Ansi se santifiko el nombre del “Kriador” en el puevlo.
