En un largo artikolo datado de 04/01/2014, sinyado por Rivkah Ginat, la autora mos avla de la lucha intensiva de munchos pedagoges İsraelyanos para krear establesimyentos edukativos interkulturales en el eskopo de pushar ninyos de medyos diferentes en direksyon de un mijor entendimyento resiproko.
Segun el sentro sosyal de statistikas 42% de djudyos İsraelyanos se deklaran absolutamente laikos, 12% profundamente relijyozos, 13% partizanos de un nasyonalizmo relijyozo i 25% ke se afirman tradisyonalistos.
En el korso de la anyada eskolarya 2012/2013 (el anyo pasado), 1.169.711 ijikas i ijikos israelyanos fueron inskritos en el sistema edukativo djudyo jeneral del payis, entre eyos 668.692 en eskolas governomentales laikas i 212.379 en establesimyentos governomentales relijyozos.
En desparte de estos estudyantes ke sigen el programa edukativo klasiko adekuado al medyo sosyal al kual kada uno apartyene, egziste en İsrael eskolas por ansi dezir mikstas ke van de la primera klasa asta la terminal, ande elevos i elevas haredim se mesklan a elevos i elevas de famiyas irrelijyozas, kon el solo ovligo de respektarsen mutualmente...
Desde la entrada de semejantes establesimyentos, ya se remarka immedyatamente la diversidad de los estudyantes, los unos kon la kipa en la kavesa, los otros ke entregan sus kaveyos al kapricho del ayre, en djuntos kon ijikas kualas kon fustas i mangas largas, kualas otras ke yevan ‘pantis’ sin ke esto pareska estranyo ni indesente. Tambyen syertos elevos dizen la Beraha antes i despues de komer kualkyer koza, otros los miran orrasyonar en silensyo sin interrumpirlos.
Al pareser, para los dirijentes, uno de los prinsipales objetivos es de krear un ambiente harmonyozo ande los elevos, malgrado sus diversidad, se ambezaran a bushkar no lo ke los separa ma lo ke los ata los unos a los otros.
Komo todos ya lo savemos, aun la grande solidaridad ke egziste entre sus myembros en momentos de peligro, una de las partikularidades las mas flagrantes del puevlo djudyo es la multitud de puntos de klivaje (intelektuales komo tambyen relijyozos) ke egzisten entre los differentes grupos de la populasyon, kada uno kon sus propyas opinyones, prekonizando i luchando kon insistensya por sus propyo ideal envezes severo ke se refera a tekstos veneravles de grande valor historika o byen otras vezes mas serkano de las ovligasyones adekuadas a la epoka aktual.
Un vyejo refran sefardi dize ‘doz djudyos tres kehilod’. Esta chika dicha no es solo una remarka empapada de humor, eya ekspresa la varyedad de pensamyento de muestro puevlo, lo ke es una rikeza todo en syendo un estado de kontinual kontestasyon.
A este propozito, devemos akseptar ke ‘un pensamyento monolitiko ke no konosyo el dubyo porke echo de un solo bloko’ no puede posedar una valor real tanto ke el no tyene la eksperyensa del choke de argumentos ajenos ke pueden konfortar o byen kontraryar los suyos.
La konfrontasyon no arrebasha, al kontraryo eya puede realsar, a la sola kondisyon de ambezarmos a oyir pozitivamente lo ke propoza el otro i a bushkar en los argumentos ke son kontraryos a los muestros, la chika parsela de verdad ke eyos puedran kontener… La konfrontasyon kuando es honesta mos ansenya mizmo envezes a akseptar de bivir kon los ke tyenen otros simboles i paradigmos ke los muestros, syempre sin renunsyar ovligatoryamente a muestras konviksyones.
‘Esta avyertura al otro, kual ke sea este otro, todo en syendo parsyalmente espontanea, puede igualmente venir de la edukasyon eskolarya, la kuala tyene el poder de darmos una persepsyon mas ancha de lo ke mos entorna.
En un payis ande las diferensyas de kreensas devyenen emosyonalmente de mas a mas dolorozas, eskolas ke edukan a los ninyos i adolesentes a ser avyertos los unos a los otros sin nada impozar ni nada renyegar, puede de mas a mas azer enfloreser la syensya i la sivilizasyon en sus sinyifikasyon la mas novle.
La kondisyon humana es echa de insertidumbre i oy en dia bivimos en una epoka ande todo puede trokar de un punto al otro.Ke sera un mundo sin esforso de komprensyon i de ayudo resiproko?
