Martes la noche de la semana pasada, el 22 del mez koryente, no se si fueron nombrozos los frankofones de muestra komunidad ke sigyeron sovre el kanal de televizyon ‘France 2’ la emisyon intitulada ‘Un jour un destin’ konsakrada a Anne Sainclair, lakuala por la primera vez desde tres anyos tomo la palavra en publiko despues el drama del hotel Sofitel de New York en el anyo 2011 ande su ex-marido Dominique Strauss-Kahn fue tratado de una manera monstruoza
Esta resyente emisyon fue sin dubyo un largo momento de emosyon i de dulse reminisensya para munchos de entre mozotros ke antes 20 anyos eramos los admiradores de Anne Sinclair, briyante djornalista ke (kada tadre de Alhad en el programa semanal ‘Sept sur Sept’) intervyuva los mas grandes personajes de la politika komo tambyen de la literatura, filozofia i arte.
Syempre sonriente, su ancha kultura i la vivasidad de su esprito le permetian de formular kestyones a las kualas los invitados se sintian kaji ovligados de responder mizmo si les era difisil de azerlo... Noche de Martes de la semana pasada, fue eya personalmente ke era interogada por el djornalisto ‘Laurent Delahousse’
En desparte de eyos dos, se topavan sovre la mizma shena de T.V. munchos de sus serkanos, paryentes i amigos, loskualos retrasaron ‘kon rekuerdos personales i fotografias’ lo ke fue el destino de esta mujer, remarkavle no solo grasyas a su ermozura i su intelijensya ma sovre todo grasyas a la rikeza de su personalidad ande, mizmo oy, la dulsor de su sonriza se meskla a la akuidad de su mirada..
Los ke tomaron la palavra fueron unanimos a konfirmar su alto nivel intelektual komo igualmente la tenasidad de su karakter. Entre eyos se topava su primer marido ‘İvan Levai’, djornalisto byen konosido ke (mizmo despues sus divorsyo) kontinuo a manifestar su grande estima no solo a la ke 25 anyos antes era su mujer, ma tambyen a Dominique Strauss-Khan el mizmo.
Segun lo ke mos ambeza Wikipedia, Anne-Elise Schwarz nombrada aktualment Anne Sinclair es la ija de Micheline Nanette Rosenberg i de Joseph-Robert Schwarz, grande industrial i kavalyero de la ‘Legion d’honneur’ ke troko en el anyo 1949 su nombre en ‘Sinclair’.
Su avuelo maternal ‘Paul Rosenberg’ tenia una selebre Galeria de Arte ande se topavan ovras de los mas grandes pintores entre los kualos multiples pinturas de Pablo Picasso ke el desho en herensya a sus desendyentes.
Eya nasyo en New York i es kuando tenia 3 anyos ke sus jenitores se instalaron en Paris, ande mas tadre la ninya de entonses pudo azer estudyos muy altos ke le avrieron las puertas de un destino muy riko komo tambyen muy dolorozo..
En efekto, despues su divorsyo de su primer marido ‘İvan Levai’ del kual se separo en una total komunyon de voluntad, Anne Sinclair se kazo kon Dominique Strauss Kahn, kon elkual eya konosyo largos dias de felisidad i de glorya, komo tambyen momentos terrivles de humilyasyon i de odyo publiko.
Eya kedo syempre al lado de su marido durante la trajedia del mez de Mayo 2011 ke echo DSK del punto el mas alto de la glorya ande se topava en su kualidad de direktor jeneral de la IMF, al abizmo el mas profundo de la degradasyon.
Fueron dias pretos, dias de akoso i de dekadensya ande subitamente ‘el rezultado briyante de un lavoro ekstraordinaryo’ se undyo en el kaos de una vindikta kaji salvaje, a la sigida de una desizyon judisyal de kulpabilizasyon tomada por un tribunal amerikano antes mizmo de azer una kualkyer enkuesta, sovre baza simplemente de la kesha de una mujer kaji analfabeta, sin el mas chiko indisyo vizivle ni testigo para konfirmar el fakto.
150.000 diaryos o hebdomadaryos eskrivyeron a este sujeto, jeneralment en desfavor del akulpado, pretendido ser un vil kriminal… pokos fueron los ke protestaron kontra una semejante prosedura.
Es solo despues un tyempo relativamente largo, kuando (en segida de una verdadera enkuesta) el Tribunal Amerikano pronunsyo una desizyon de total liberasyon, ke Anne Sinclair tomo la desizyon de divorsar.
Noche de martes de la semana pasada, kuando el djornalisto Laurent Delahouse le demando si eya pensava ke en el hotel Sofitel uvo un akto de violasyon, Anne Sinclair respondyo kategorikamente, de un tono ke no admetia ninguna objeksyon: “El tuvo una kodukta infantil, pueril i inkoherente. El ya savia ke en estos dias ke presedavan la eleksyon prezidensyal, los ojos de sus enemigos estavan fiksos sovre kada uno de sus aktos i djestos, ma yo no pensi nunka ke el fue un agresor, ‘nunka krei ni kreo semejante koza i se ke no fue el kavzo’. El es un seduktor ma no un agresor’’ (Je n’y ai jamais cru, je ne le crois toujours pas, et je sais que ce n’était pas le cas. Lui est un seducteur, mais pas un agresseur).
A la kestyon: ‘si se tratava de un komploto?’ eya disho ‘No kreo ke uvo komploto, ma una terrivle voluntad de amplifikar muncho las kozas … penso ke las Autoridades fransezas no fueron totalment neutres, se tratava de un kavzo ke (para Nicholas Sarkozy) era komo un djenero de ‘Pan bendicho’,
Oy en dia, Anne Sinclair es direktora editoryal de la gazeta ‘Huffington post’ en lingua franseza. Su kompanyero de vida aktual es el historyano Pierre Nora“, myembro de la Akademia Franseza, de konfesyon djudia komo los dos presedentes.
