Lunes de la semana pasada el 5 del mez koryente, durante la seremonia komemorativa del aniversaryo de la kreasyon de la Gazeta Milliyet, el editoryalisto Sami Kohen resivyo una plaketa de honor en su kualidad de veterano ke kontinua syempre a tener una actividad de alta kualidad en el espasyo djornalistiko i partikularmente en el sektor de politika estranjera de muestro payis.
El patron del djornal ‘Erdoğan Demir Ören’ ansi ke todos los editoryalistos del Milliyet lo felisitaron kalorozamente. Son muy raros los gazeteros ke lavoran sin interrupsyon durante 60 anyos en un mizmo sektor djornalistiko; Sami Kohen es uno de entre eyos,
Ansi, despues de aver resivido el premyo en kestyon, muestro amigo tomo personalmente la palavra para ekspresar su gratitude i su grande alegria de ser gratifikado de un semejante djesto de apresyasyon i adjunto ke el se syente personalmente identifikado al Milliyet, asta el grado ke kuando se pronunsya el nombre ‘Sami Kohen’ es ‘Milliyet’ ke vyene al tino.
El entro al servisyo de la gazeta en el anyo 1954 djuntos kon su muy serkano amigo Abdi İpekçi del kual devino el mas intimo kolega. Durante largos anyos el fue direktor del departamento de‘relasyones eksteryores’ i tyene ainda la okazyon de asistir a konferensyas internasyonales i eskrivir artikolos sovre los grandes eventos ke okuren en varyos lugares del mundo, komo: konfliktos entre dos payizes vezinos, revoltas lokales o litijyos de una importansa kaji universal etc…kavzos de los kualos el bushka i analiza syempre los faktores ke pudyeron provokarlos ansi ke las posivles reperkusyones ke eyos puedran tener sovre la Turkia i su politika. Por esta razon el pudo ser muy apresyado i resivir ‘munchos premyos i markas de konsiderasyon’ aryento komo tambyen ahuera de muestro payis.
Grande espesyalisto (komo lo vimos mas arriva) de kestyones i problemas de politika estranjera i primer nombre djudyo ke figuro en la Prensa Turka, el imprimo una marka indelebile en la gazeta Milliyet a la kuala el se syente profundamente atado profesyonalmente komo tambyen afektivamente.
En una chika investigasyon ke ize en varyos sityos de la prensa elektronika, topi syertos detaylos i faktos komplementaryos ke me ago el plazer de transmetervos debasho estas linyas.
El fue el primer djornalisto turko a sigir i eskrivir sovre la Albania kuando eya era ainda debasho la influensa de Staline i el primer a azer un ‘reportaje’ sovre la Kina durante la epoka de su revolusyon kultural, komo tambyen en el anyo 1971 el primer a vijitar este payis, tres mezes antes Richard Nixon i Henry Kissinger.
İgualmente el fue uno de los primeros a eskrivir largamente sovre la invazyon sovietika de la Chekoslovakia en 1968, i de la okupasyon Turka del Norte de Chypre (Kibris Adasi) ansi ke del asasinato en el anyo 1980 del Embashador Turko en el Kanada.
En desparte de la kontinual prezensya de sus Artikolos en el Milliyet, el eskrive tambyen por syertos otros diaryos i revistas de los Estados Unidos komo tambyen de İngiltera, prinsipalmente: the Christian Science Monitor, the New York Times, Newsweek, the Guardian and the Economist.
La jubilasyon ofisyal de Sami Kohen fue fyestada unos kuantos anyos antes, ma el kontinua syempre, kuatro vezes a la semana, a darmos regolarmente en el Milliyet ‘artikolos de grande valor sovre la politika Turka en la aktual atmosfera konfuza de un mundo en perpetual rebuelta’.
