El liseo Notre Dame de Sion, kon el patronaje de Mr. Henri Vantieghem, el Konsul Jeneral de Belchika en Estambol, i Mme. Lievain Vantieghem, avrieron sus puertas para presentar una koleksion de fotografiyas importantes de George Simenon, de negatives orijinales de la Universidad de Liège.
La seleksion del eskrivano Belchikano, “Citoyen du monde”, presenta fotografiyas realizadas en el kuadro de reportajes de viajes, por las gazetas “Paris-Soir” ets. Sus livros fueron ovras ke influensaron el sinema amerikano i italiano desde los anyos 1932.
Los sineastos izieron akseptar difisilmente a Simenon la adaptasion al 7en arte. El aktor selebre, Jean Gabin, interpreto mas de una vez el dedektivo Maigret atado al romansiero.
Simenon ke vijito munchos kontinentes i paizes, arivo en 1933 en Estambol para deskuvrir la sivdad kosmopolita ke izo sonyar eskrivanos romansieros del oksidente. Su viaje tiene por buto tambien de entrevistar.por Paris-Soir, Trotski egzilado, ke bivio en Büyükada, la somptuoza isla prinsipal de Marmara durante kuatro anyos.
Estambol, el kondjunto de la mar de Marmara, el Kuerno de Oro, la Grand’Rue de Pera, animada de tavernas, bares i kabaretes komo Maxim. la Patiseriya Tokatliyan, la isla Büyükada (ke la nombra “Prinkipo”), el otel Splendid Palas, alimentaron Simenon i izieron naser nombrozas ovras maraviyozas.
La Galerie ke fue transformada de muestra biblioteka, es de no mankar de vijitar...
