Desde dia de Martes pasado la tadre, la Turkiya esta en dolyo, un dolyo asumido por el puevlo en su totalidad, un dolyo mesklado en mizmo tyempo a una profunda tristeza, komo tambyen a una irrepresivle revolta kontra la indjustisya de un destino syego i indiferente.
Kaji en kada lugar del payis, serkano o leshano de ande se produzyo la terrivle trajedia, vyejos komo mansevos yoran en un djenero de komunyon espontanea kon la dolor de las madres, mujeres i ninyos ke no veran mas nunka sus ijos, maridos o padres, loskualos unos kuantos dias antes eran ainda yenos de vida, riendo i puede ser kantando.
Mas de 300 ovreros muryeron entregados al kapricho de un hazardo obskuro provokado puede ser por una simple neglijensya involuntarya del uno de entre eyos mizmos o (es tambyen posivle) por otros faktores ke no fueron ainda elusidados i ke por el momento kedan en el dubyo...
Eyos fueron arrankados a la vida prinsipalmente por un suerte echo de mizerya i de prekaridad, ombres en sus mayoria a la flor de la edad, kada uno kon sus aspirasyones i sus dezeos ke no tuvyeron el tyempo de kumplir, ombres ke eran por la mas parte los pilares de sus kazas i ke seraron por syempre sus ojos a un mundo ke malorozamente no supo o pudo preveer el peligro al kual eyos eran konfrontados.
Pokos fueron los ke pudyeron salvar i salir bivos del inferno de la mina de karvon en fuego, entre eyos algunos kontaron ke munchos de los ke kedaron por kavza de obstakolos insurmontavles, seraron los ojos en orasyonando...
Kualas pudyeron ser sus ultima palavras? Fidelidad a una kreensa inebranlavle? o byen ‘dezespero absoluto? ‘Sometimyento’ o ‘revolta’?
Desde dia de myerkoles manyana, sovre las karas de los ke tenian un serkano al fondo del inmenso pozo avyerto a syenes i syenes de metros debasho de tyerra, se meldava la terrivle anksyedad de saver ke en la obsksuridad opaka de una noche eternal, uno de sus keridos se estava desbatyendo kontra la muerte i poko a poko las fujitivas esperansas (ke se obstinavan a aklarar de vez en kuando la mirada de raros optimistos) empesaron tambyen a dezapareser gradualmente i lo ke era una doloroza inkyetud empeso a devenir una realidad kaji palpavle.
Estos dias kedaran ainda por un largo tyempo en la memorya de kaji todos, komo dias de angusya i de desmamparo ande la kriansa humana se topa delantre una indjustisya al pareser inegzoravle.
Kaji todos los ‘Grandes’ del payis estavan prezentes esforsandosen de ayudar i konsolar.
Syertos de los dirijentes de la mina de karvon fueron yamados i kestyonados de parte de las Autoridades Judisyales del Payis, kualos liberados poko tyempo despues, kualos detenidos.
El tyempo mostrara si uvo neglijensya o kualkyer otra responsabilidad.
Bivimos en un tyempo ande la vida humana pyedro su importansa kapital i su sakralidad, un mundo ke kaji en su totalidad se topa en un djenero de chaos ande todo parese ser en un estado de insertidumbre indeshifravle, la buendad mesklada a la maldad, el kudyo a la indiferensya i la luz a la obskuridad.
