En el sigundo diya de Pesah, oganyo myerkoles el 16 de Avril, empesimos a kontar el Omer. El Kalendaryo Ebraiko estava amostrando tambien el 16 Nisan. Sefirat Omer es un komandamiento de la Tora. Kada Djudio deve kontar el OMER i ansi dize el Pasuk: “ …i todos vash a kontar (Vayikra 23:15)
Deke kontamos el OMER? “Al salir de Misraim, los djudios kon despasensya ampesaron a kontar los diyas. Porke, al 49en diya, ivan a resivir la TORA en el Monte de Sinay. İ mozotros de mizma manera, ampesando de la sigunda noche de Pesah, durante 7 semanas kontamos el Omer.”A la fin de 49 diyas, en el 6 de Sivan se eskapa kon la fyesta de Shavuot.
En la Istoria de los djudios la perioda de Omer fue markada por desgrasyas i malores. Myentres la rezistensya de Shimon Bar Kohba kontra la dominasyon romana muryeron munchos kombatantes djudios. Una leyenda Talmudika dize ke tambien en esta perioda nombrozos elevos del grande savyo “Rabi Akiva”* peryeron la vida en una epidemiya.
Es una perioda komemorativa de dolyo, no se aze selebrasyones komo bodas ets... En el 33. diya, el 18 de Iyar uvo komo un kalmo en las violensas. Este diya sakro konosido komo “Lag Baomer”, tiene apoyo sovre eventos istorikos. Es una festividad en el kalendaryo ebraiko ma no mensyonada en la “Biblia”. En Lag Baomer se aze divertimientos i selebrasyones, entre otras a la memorya del Tanna (savyo, doktor de la Ley) Rabbi Shimon Bar Yohay i su ijo Rabi Eliezer.
En el Monte Miron se topan sus tombas. La tradisyon dize ke eyos 13 anyos se eskondyeron en una grota myentres las persekusyones de las fuersas romanas. El famozo Tanna Bar Yohay ke era dishiplo de Rabbi Akiva, aviya tambien tomado parte en la rebelyon kontra el Imperador Adrianus.
Omer, Sefira, Lag Laomer...byervos ke sintiya en mi chikes ma ke no entendiya... En eskrivyendo esto, kon una sonriza nostaljika otruna vez me fui a los anyos 40... Mi Nono (de b.m) kontando el Omer me diziya “Mira Coya, oy es el treser... o el kinzen ets... diya del Omer”. Me dava eksplikasyones difisil de entender para una ninya de 7-8 anyos. Yo enganchada en la idea ke Omer era un personaje le demandava: “Papu, kuando va vinir este Omer??!!”.. Despues se adjusto el byervo “Sefira”. Mi madre (de b.m) me lo ekspliko tan bueno ke fue para mi syempre sinonimo de “defensa de lavrar, brodar i kuzir despues la aparisyon de las estreyas”.
Lag Laomer... este byervo era reelmente una enigma para mi!. Pensava ke deviya ser una fyesta, ma en kaza no aviya dingun siman komo uzavamos en Purim o Pesah... Agora tornaremos a la Istorya. El Tanna Bar Yohay muryo el 18 Iyar, 33. diya del Omer. Desho de sava ke su muerte no seya kavza de dolyo, a la kontra se aga festividades. Asigun una leyenda al murir de Bar Yohay su kaza se incho de una luz i de un fuego ke turo diya entero. Ansi, en las selebrasyones de Lag Baomer del Monte Miron, a lo largo de la nochada se bayla, se kanta al doredor de los chikos fuegos ke se asyende tambien en todas las partes del pais. Tuve la shans de ver las festividades nokturnas de Miron antes munchos anyos.
*Akiva Ben Yosef: (40-135) Grande savyo djudio. Su lavoro “Halaha” fue la baza de la Mishna. Su vida fue sujeto a nombrozos kuentos epikos i leyendas. Dizen ke Akiva era un pastor i fue despues de la edad de 40 anyos ke empeso a estudyar. Manaderos afirman ke su mujer Rahel lo apoyo durante largos anyos de estudyo. Akiva desvelopo el Midrash. La mayoriya de estas ovras eskritas en el 2. Siglo apartienen a su eskola. Manaderos afirman tambien ke, akzado de aver enflamado la rebelyon, fue enkarserado por los romanos en la prezyon de Caesarea i egzekutido.
A kontinuar...
