Komo ya lo meldariash todos en la prensa internasyonal, Shabat pasado el 24 del mez koryente, 2 asaltos kriminales kontra el djudaizmo se produzyeron en el intervalo de dos o tres oras, el uno klaramente asasino en Beljika, el otro brutal i salvaje ma no mortal en Creteil, serka del hospital Henri Mandor, en la periferia serkana de Paris.
El ‘Jerusalem post’ deklaro desde alhad demanyana ke dos de entre los ke pedrieron la vida en Bruksel eran turistos İsraelyanos de pasaje en Beljika.
Ainda no se puede nada afirmar konsernando el orijen o el real motivo de los ke kumplieron el akto kriminal… Por el momento ningun de los testigos okulares pudo dar un kualkyer indisyo realmente prechizo konsernando el autor del akontesimyento ke eyos mizmos bivyeron.
En todo kavzo, los dirijentes de los dos payis, sin nada pueder afirmar por kavza de falta de provas konkretas, paresen ser konvensidos ke se trata de 2 horrivles aktos de antisemitizmo i renforsaron immedyatamente la proteksyon al entorno de todos los edefisyos komunitaryos djudyos.
François Hollande Prezidente de la Republika Franseza demando a su puevlo de azer todo lo ke es posivle para luchar kontra el rasizmo i el antisemitizmo. El disho tekstualmente lo sigyente: “Devemos, mas ke syempre, ser mobilizados kontra el antisemitizmo i konsyentes ke la Evropa yeva en eya Valores i Prinsipyos por los kualos semos ovligados de luchar afin de pueder mentenerlos.”
Es-ke esto puedra ser posivle en un mundo entregado a la violensa syega de un arrivizmo salvaje?
Por de mas, en este momento el mundo oksidental i partikolarmente la Fransya se topan en un estado de terrivle konfuzyon despues el triste rezultado de las eleksyones konsernando la Unyon Evropea, rezultado ke konfirma la sertitud de una evidente pujita del ‘Ultra-Nasyonalizmo’ portador de sentimyentos gzenofobos i de “refuzo del otro”.
Se ve en munchas partes del Oksidente komo un retorno en direksyon de ideas i opinyones konsideradas despues la segunda gerra mundyal komo malsanas i kadukas; retorno byen entendido disemblavle en su manifestasyon, envezes moderado i poko perseptivle o otras vezes al kontraryo brutal i portador de una inimistad inkomprensivle por el estranjero.
Una kestyon mos vyene otomatikamente al esprito konsernando los dos golpes kriminales perpetrados kaji simultaneamente Shabat pasado: “Es ke se trata de un akto de antisemitizmo lokal?” lo ke parese ser mas ke irreal, o byen de “una agresyon semejante a la ke se produzyo en el anyo 2012 en Toulouse, a la entrada i en la guerta de una eskola djudia ande ninyos por la mas parte İsraelyanos avian sido matados sin piadad ni remorso de parte de un fanatiko?”
Las tentativas de asaltos djihadistos se manifestan de mas a mas en el kontinente Evropeo, kualas detektadas antes sus realizasyon, kualas otras malorozamente perpetradas kon una krueldad inyovle.
Bivimos en un mundo estranyo ande todo lo ke ayer paresia ser una verdad devino en supito mentira, ande la repuesta a kualkyer kestyon introduze eya mizma un muevo problema al kual se deve bushkar una mueva solusyon, komo si kada afirmasyon yeva en eya el premisyo de un muevo dubyo.
Tal ke lo repetamos syempre, mos topamos en una epoka no solo bivalente o trivalente ma prinsipalmente ambivalente en su esensya, una epoka ande kada koza parese tener dos fachas: la una luminoza, la otra obskura.
Entonses ke puedra ser el destino de las komunidades djudias en la diaspora, sovre tyerras ajenas, ahuera de Israel?
