“No me importa ke mis filmos no plazgan de la primera vez. Mismo yo, los filmos ke me davan estrechura al alma, despues de anyos, estos fueron mis filmos favoritos...”
A los ke le demandan por la lentor de sus filmos, Ceylan responde:
- Para mi el tempo del filmo tiene ke ser ansi. Los filmos se deven de kontar, amostrar los detalyos lentamente, kon su tempo. Es mi interpretasion. No kero dizir ke mis senarios son lentos - penso ke los otros son de aksion muy ajitados... Yo la vida, la siento, la veyo de esta manera...
Ke kontan los kritikas del 7en arte por Ceylan:
JOEL COEN:
“Ceylan, el metor en sena Turko, mos enkanto kon su filmo İklimler (Sezones) antes dos anyos; lo topimos ekstraordinario. Si los kovboyes puediyan ver los filmos Turkos, ke bueno iva ser!”
La opinion de otros kritikas de arte:
“Desde Bergman, no vimos un senaristo de esta valor.” “Si A. Chekhov era senaristo, no puediya azer mijor filmo.”
JANE CAMPION, la metora en sena kon Oscar: “Para ser mas objektivos, desidimos de azer el voto konfidensial. Una ovra maestra intelijente i sofistikada.”
***
Ceylan, diskreto, meldo munchos livros, es ansi ke se formo. El pensava ke toda la siensa i la kultura esta eskrita en los livros.
Estudio la Elektrisita en la Universita de Bogazici. Su vizion troko: Se torno verso el oeste. Bivio en Londra, ets... Viajo el mundo fina Nepal,.ande kamino durante un mez, i en las montanyas Himalayas, kon bisikleta, otostop, kon su kamera, para ganar su vida.
Espantandose de no pueder reushir en la sinematografia, se lanso muy tadre. Ma su amor por el sinema era grande.
Resivio munchos premios kon sus filmos primeros. Antes del premio de Cannes, por egz. el Premio Caligari en Berlin.
Sus filmos los mas reputados son:
Bir Zamanlar Anadolu’da, Kasaba, Üç Maymun, Uzak İklimler.
Si fondio su egzistensia estando leshos de la kultura popular, no se pudo fuir. Para azer plazer a su ijo Ayaz de 5 anyos, se fue a ver “Recep İvedik”.
***
Resivio la Palma de Oro kon los aktores del filmo Melisa Sözen, Haluk Bilginer i Demet Akbağ.
Es el amerikano Quentin Tarantino i la aktrisa Uma Thurman ke le presentaron el Premio kon las palmas, en la somptuoza sala de Cannes.
“Esto kontente de yevar este Premio valorozo a la Turkiya, mi payis, despues de 32 anyos. Es Yilmaz Guney ke lo avia ganado antes. Koinsido kon el sentenario de la industria de la sinematografia en Turkiya.”
Ceylan dediko el Premio a los jovenes Turkos. Kontinuo en rengrasiando el komite ke le dio el Premio malgrado la largor de su filmo (mas de tres oras)...
***
Esperando ver en serka KIŞ UYKUSU (Hibernasion), felisitamos Ceylan ke supo forsar los limites de su arte. Esperamos i le suetamos la kontinuasion de su sukseso en la sinematografia.
