En el teksto presedente avli de mis rekuerdos de los presipyos anyos del 1940. Espesyalmente relati lo ke me aze akodrar el Sefirat Omer i Lag Baomer. Byervos ke sintiya en mi chikes ma ke no entendiya…No los entendiya, es verdad. Portanto me desharon sus rekuerdos. Byervos ke syempre me azen akodrar akeyos anyos kon nostaljiya…
Despues de aver eskrito tanto sovre el Omer, para mi es muy natural de avlar tambien de Shavuot. Es kuryozo, anyos i anyos para mi los byervos Sefirat Omer, Lag Baomer i Shavuot syempre estuvyeron endjuntos. Nunka el uno sin los dos otros.
La fyesta de Shavuot, es sitada tambien komo “Hag Habikurim”. Es una de las tres grandes fyestas, djuntos kon Pesah i Sukkot. Eskapando la “Sefirat Omer” de 49 noches, en el 6-7 Sivan, oganyo el 4-5 de Junio vamos a selebrar la Fyesta de Shavuot. İ aki una sitasyon:
“…en este Diya abasho D.al Monte de Sinay a dar la Ley a su Puevlo Yisrael.. Asigun la Leyenda, David Ha Meleh, muryo en Shavuot. Es una de las razones de meldar la Megila de Rut en Shavuot, syendo ke el Rey David era el desendyente de Rut la Moabita..”
Oy es el 11 de Mayo, “Diya de la Madre”. Malgrado ke pensi ke tengo muncho tyempo para eskrivir sovre Shavuot, mis penseryos se fueron a mi kerida Madre (de b.m) komo syempre en este diya i al tradisyonal “sutlach de Shavuot” ke saviya azerlo tan savrozo. İ, sin ezitar desidi de eskrivir el teksto en este diya espesyal komo un regalo a mi Madre. Shavuot es la fyesta ke me aze nombrarla en kada vez kon sus rekuerdos…
Rekuerdos ke me yevaron otruna vez a mis chikos anyos, kon un sentimiento de eskarinyo i nostaljiya. Espesyalmante a los anyos 1941-42 ke fue la perioda, puedo dizir la mas triste i pesimista de mi chikes. Asigun ya lo tengo eskrito munchas vezes, mi kerido Papa (de b.m) estava leshos, en el servisyo militaryo de 20 klasas. Eran los anyos de Gerra, de estrechuras, de mankura de syertas kozas, mas i mas de asukar…
Siguro ke afitava ke no se pudiya azer las dulsuryas tradisyonalas de las fyestas. Portanto el enverano del anyo 42, mi madre mos estava aparejando una sorpreza. Engrandesida en una famiya tradisyonalista, syempre perkuro a konservar muestras valores tradisyonalas. Asigun eya, a todo presyo, no se deviya deshar pasar la fyesta de Shavuot sin azer el “sutlach de arroz”… Komo se save, el otro nombre de Shavuot es “Fyesta de leche i miel”…
İ, kon este dezeo, estuvo invyerno entero ekonomizando pokas, pokas kantidades de asukar a la eskondida de todos mozotros. Eramos bastante nombrozos syendo ke la famiya de mi papa emigrada de Chorlu, estava en muestra kaza akeya epoka. Dunke, Shavuot ya estava aserkando. En desparte, la Primavera de akel anyo aviyamos ampesado a sintir rumores dizyendo ke los soldados rezervistos ivan a ser liberados en muy serka tyempo.
Estavamos asperando kon grande despasensya. A kada chapteada de la puerta, a kada soneriya estavamos koryendo ken i ken a avrir… Mi madre, tan sigura ke el Papa iva venir, finalmente izo el famozo sutlach ke le plaziya tanto a mi padre. Demanyana de 6 Sivan, mi Nono i mi tiyo se fueron al Kal. Uzavan irsen al “Kal de los Edirnelis” aktualmente el Sentro de Kultura “Schneidertempel”. Moravamos muy serka. Los asperimos al dezayuno. Lo komimos el sutlach, un poko desganados, muy deziluzyonados. El Papa miyo no aviya vinido…Despues del dezayuno mi Nono mos konto la estorya de Rut…
Anyos i anyos pasaron, mas de 70 anyos. Ma nunka me olvido akeya demanyanada del Shavuot del 1942, komo nunka me olvidare la savor del sutlach ke aziya mi madre. En paz ke repoze Amen… 11 Mayo 2014-Estambol.
