Oy, miliones de personas estan sufriendo de hazinuras norolojikas komo depresion, parkinson, alzeimer, i otras. El meyoyo es la mas difisil parte del puerpo ke se puede analizar. Es muy difisil de entender kualo esta trublando el meyoyo. Miliones de dolares se esta gastando en los Estados Unidos para topar remedio a estas hazinuras. La mas difisil kestion del hazino es, si la hazinura le va pasar kompletamente. Munchas vezes los norolojistos no estan puediendo responder esta kestion.
Segun un artikolo de Ari Rabinovitch, la kompaniya israeliana Brainsway, ke envanta muevos enstrumentos medikos, envanto una kaska ke esta embiyando ondas manyetikas a las partes hazinas del meyeyo. Segun Brainsway, kon la rezonansa manyetika, estan puediendo suivar el puerpo umano kon kolores, i kon tridimansional vizuales, i ansi, estan puediendo analizar mezmo el meyeyo. En embiyando sinyales a las siertas rejiones del meyoyo, esta enerjiya esta metiendo en orden los norones, i esta mijorando la fonksion de las partes afektadas del meyoyo. Oy, kon esta teknolojiya reusheron a kurar la depresion. Brainsway esta esperando ke esta kaska se va vender en muevos marketes, kuando vana reushir a kurar las otras hazinuras norolojikas kon esta sistema.
Esta metod konosida komo ‘estumulasion manyetika transkraneal’ va ser una version mas segura, i mas presiza ke la terapiya de elekroshok, i se va pueder empleyar por munchos anyos.
Segun Brainsway, esta teknolojiya es unika, porke esta puediendo entrar mas profondo a las partes del meyoyo ke no fueron alkansadas fin oy. El anyo ke pasimos, la Administrasion Federal de Kuras aksepto ke esta kaska se puede empleyar por kurar los hazinos kon la depresion major. Brainsway esta kontinuando a azer eksperimentos por kurar las otras hazinuras norolojikas.
El direktor tekniko de Brainsway disho ke el esta optimisto por un estudio ke se esta realizando en la Universdidad de Harward, para kurar la epilepsia.
