Segun lo ke eskrive la Prensa internasyonal, Alhad pasado el Papa Francis , el Prezidente İsraelyano Shimon Peres i el Prezidente Palestinyano Mahmud Abbas orasyonaron djuntos en la Guerta del Vatikano i plantaron un arvole de azetunas simbolo de la Paz.
Psalmos del Rey David, una orasyon de arrepentimyento de Yom Kipur, i una otra de Nahman de Breslavia vibraron en la serenidad de la atmosfera al momento ande el sol empeso a dezapareser en el horizente.
En su diskorso el Papa disho ke los dos Prezidentes deven responder afirmativamente al dezeo de paz de sus puevlo respektivo.
El insistyo ke “La Paz demanda oy mas koraje ke en el pasado, mas animo de dizir ‘Si’ a enkontros i no a konfliktos... ‘Si’ a un dialogo i no a la violensa ...’Si’ a negosyasyones i no a hostilidades... Esto egzije tenasidad”
Ay en el aktual Shefe espiritual del Kristyanizmo una dimensyon ethika partikular. Al pareser, para el su funksyon no se limita a la strikta observansya i transmisyon de los dogmas de la Fey ke es la suya, ma tambyen al absoluto respekto de las otras dos kreensas i partikolarmente a las vertudes humanas.
El se esforsa a konsakrar la mas grande parte de su Saserdosyo a luchar kontra la indjustisya, la mizerya i los konfliktos destruidores ke arrebashan kualkyer relijyon.
Se puede dezir lo mezmo por Shimon Peres ke se topa aktualmente a la edad de 90 anyos a la fin de su ultimo mandato de Prezidente de un payis muy chiko komo superfisia ma muy grande en su esforso de adelantamyeto en varyos ramos de la syensya i de un puevlo ke aun su varyedad de pensamyento i sus frekuentes diverjensyas de opinyon, save kedar muy unido i syempre en kudyo los unos de los otros en los momentos difisiles.
A la okazyon del kombite del Papa, el estima ke el muevo governo de ‘la Unyon Palestinyana’ no puedra turar un largo tyempo. Sus palavras fueron: “No se puede bivir al seno de un mizmo Estado kuando el uno de los partidos es favoravle al terrorizmo i el otro kontraryo”.
No konosko bastante el Prezidente Mahmud Abbas para tener el derecho de formular kualkyer opinyon a su sujeto, en todo kavzo el fakto de aver akseptado de ir orasyonar en un lugar konsiderado Santo de parte de una otra relijyon, kon partenaryos de otras kreensas ke las suyas, es un punto muy pozitivo ke mos da una idea de lo ke es su ideal.
İntervyuvado por el korespondyente de una gazeta italyana, el deklaro tener la esperansa ke esta Orasyon kolektiva va ayudar Israel a desidirse por una solusyon de Paz. El disho: “En un pasado no muy leshano, endjuntos kon Shimon Peres aviamos sinyado los Akordos de Paz de Oslo, ma el aktual poder egzekutivo Israelyano se topa en las manos de refraktaryos a un semejante akordo... La invitasyon del Papa es un mensaje a los kreyentes de las tres relijyones monotheistas i tambyen a las otras... Nada deve impedirmos en la bushkida de una solusyon pasifika i nunka devemos abandonar la posivilidad de un dialogo.” Aun ke munchas kozas desferensyan estos tres grandes personajes: sus kreensa relijyoza, sus persepsyon diferente del mundo, sus proyektos o objetivos relativos al Futuro, ets...ets...una mizma koza los auna: “la konsyensya de la importansa de la Paz.”
Bushkar la paz no es abokar la kavesa delantre el ke oy es konsiderado komo un enemigo... Bushkar la paz es ‘penar a konvenserlo i a azer de el un partenaryo, oirlo i rekoneser sus derechos komo tambyen azerle entender i akseptar los muestros.
Bushkar la paz es avlar kon el antagonisto sin ser infohados en muestra sola manera de pensar ma en esforsandomos a entenderlo.
Bushkar la paz no es ‘sometimyento’ es ‘afirmasyon’, ‘no es trahisar muestras kreensas, preseptos o konviksyones’ es ‘empesar a kumplir lo ke savemos ser las valores humanas’.
Ke salgamos viktoryozos o vensidos de kualkyer konflikto, la gerra es syempre una desfecha de la vida delantre la muerte.
La paz, eya, es paridera de muevas posibilidades, muevos proyektos, muevas realizasyones i lo ke es muy importante de muevos esforsos.
‘La gerra es destruidera’...’la bushkida de paz es konstruktiva’; serka o leshos en el tyempo a venir, a la favor de faktores imprevizivles, muevos konseptos, muevas persepsyones de lo ke mos entorna i puedeser muevos ideales puedran intervenir en un kampo ande reynara si no una verdadera amistad ma a lo menos un respekto resiproko.
