Meldi un artikolo sovre un muevo projekto aparejado por mentenir la pas entre las tres relijiones monoteistas. Los judios, los muslumanes, los kristianos vana azer sus orasiones en el mezmo edifisio ke va ser konstruido en Berlin. En el mezmo edifisio, va aver una sinagoga, una eglizia, i una mishkita parake las personas de las relijiones agan sus orasiones en el mezmo lugar. De esta manera, todos va tener la oportunidad de konosersen de mijor manera. Este projekto, fin agora, no tuvo otro egzamplo en el mundo entero. Kristianos, muslumanes, i judios se vana reunir debasho del mezmo tejado.
Este projekto nombrado komo ‘The House of One’ (La Kaza de Uno) empeso kuatro anyos antes. En los diyas ke pasimos, el projekto fue prezantado al publiko por la primera vez, kon una konferensia de presa. El papaz Gregor Hohberg, el rabi Ben-Chorin, i el imam Kadir Pains izieron una asamblea endjuntos, apuntando la emportansa del dialogo. Ansi, las personas de diferentes relijiones se vana konosersen de mijor manera, i vana tener konfiensia los unos a los otros.
‘Oy las personas tienes diferentes espantos. Las personas de diferentes relijiones se estan espantando de parte a parte. Munchas vezes, este espanto esta viniendo de no konosersen muy bueno’ esta diziendo el papaz Gregor Hohberg. ‘Agora, vamos a tener tres diferentes lugares de orasion en el mezmo lugar. Keremos ke empese un dialogo entre las relijiones, i ansi va empesar una konfiensia de parte a parte’.
‘En el mundo, las tres relijiones monoteistas se enfluensaron por munchos siglos, i estan kontinuando a enfluensarsen’ disho el rabi Ben-Chorin. El rabi avlo tambien sovre la ataka terorista ke afito en Bruksel en los diyas ke pasimos. ‘En lugar de asentar i yorar por estos kavzos amargos, mos desidimos de realizar este projekto. Tengo konfiensia en este projekto. La dialoga entre las relijiones va trayer la pas i la trankilidad. Berlin, un tiempo, fue la sivdad de amargura, ma agora se va azer la sivdad de mirakolos’.
‘Lo ke empesimos a azer no es muevo’ disho el imam Kadir Pains. ‘Vos puedo dar egzamplos de la estorya. En la era de los Otomanos, el Sultan Abdülhamit II aviya konstruido tres templos en Darül Aceze ande los muslumanes, los kristianos, los judios aziyan sus orasiones debasho del mezmo tejado’.
Segun los kuentos realizados para konstruir el edifisio, i aparejar los lugares de orasion, este projekto va kostar 43 miliones de 500.000 euros. Estas paras va salir de las donasiones de la djente. Kada persona ke va dar 10 euros sembolikamente va merkar una piedra, i ansi va partisaipar a la konstruksion. Los ke keren partisipar a las donasiones pueden entrar al sitio www.house-of-one.org aparejado en tres linguas.
Nombrado en ingles komo ‘House of One’, este edifisio va ser un lugar uniko de orasion por todas las relijiones. Este projekto se aparejo en el ofisio de arshitektura Kuhn Malvezzi, situado en Berlin.
Este projekto fue eskojido en una komjpetision ande partisipo 204 propozisiones de katorze diferentes paizes.
El edifisio se va konstruir en la Plaza Petri situada en el este de la sivdad. En esta plaza, se topava antes la eglizia Petri ke se konstruizo en el tredjen siglo, ma se demolio en la Segunda Gerra Mondial, i se detruizo por entero en el anyo 1964.
El papaz Gregor Hohberg disho ke esta plaza se utilizo komo otopark fin el anyo 2007.
Este lugar va tener la aparansia de un solo edifisio, ma ariento va aver tres diferentes lugares de orasion, i un lugar komun por todos. Este lugar va ser avierto no solo la djente de las tres relijiones, ma por toda la djente de diferentes relijiones.
