Eda Danon serro por syempre sus ojos a un mundo ke eya amava i ke eya sirvyo de alma i korason kon su evidente noblesa de karakter, su senso de la amistad i su humanizmo aktivo elkual ilumino el kamino de munchos de sus amigos.
Buena konsejera kon simplisidad i sin nunka la mas chika ostentasyon, eya se esforsava de ayudar munchas personas de su entorno ke tenian problemas difisiles a rezolver.
Muy diskreta de karakter i muy novle de esprito, eya prodigava su ayudo de una manera silensyoza. A una syerta epoka, Eda resivia en su kaza, al pranso de medyo dia, amigas muncho mas aedadas ke eya afin de enalteser el nivel de sus moral i mentenerlas en una atmosfera de optimizmo.
Anyos antes, eya partisipo aktivamente a la kreasyon de un grupo de amigas ke ‘kon kantes, bayles i chikas pyesas de teatro elementaryas’ se esforsaron de transmeter a sus ninyos, al nivel de sus komprensyon, los simboles i los preseptos de baza del djudaizmo, fyestas, tradisyones i rituales.
Este grupo ayudava tambyen en el silensyo el mas absoluto, ninyos de famiyas deskaidas i leshanas ke no puedian resivir bastante ayudo en sus entorno.
Pyesas teatrales medyas en Turko medyas en Djudeo-espanyol fueron eskritas en este objetivo, laskualas enrikesyeron muncho el potensyal kultural de muestra lingua ansestral.
Oy, Eda Danon no se topa maz entre mozotros ke la yoramos, ma eya kedara syempre prezente en la memorya de sus amigos i de todos los ke la konosyeron.
Prezentamos muestras sinseras kondolensas a sus İjo, ermuera i inyetos...a sus ermano i kunyada ke biven leshos de Estambol, i a sus kunyada i kunyado Merie i Charles Danon los kualos se toparon syempre serka de Eya en los momentos difisiles komo tambyen alegres i no mankaron nunka de entornarla de kerensya i solisitud.
Ke su alma repoze en Paz.
