Sisternas - Simboles de la Peninsula de Bodrum
La peninsula de Bodrum es uno de los lugares atraktivos del oeste de la Turkiya.
Reputada kon su istoria, las aguas limpidas turkuaz de la mar Egea, sus krikas, su naturaleza, el Viaje Blu kon guletas i sus molinos de viente, arvoles de bougainvillea, ets.
Entre munchos simboles de Bodrum, el aspekto de las sisternas, proprio a si mismo, son strukturas karakteristikas.
Estos rezervuares en forma de igloo, para resivir las aguas pluviales son tipikas. Algunas son presentes, pozisionadas en el sentro publiko, enfrente del “Antik
Teatro” datado de la antiguidad. Otras se pueden apersivir en una kalejika estrecha. Otras al bodre de mar, akompanyada de un viejo arvole de oliva.
Tambien sisternas se apersiven en la punta de la montanya.
Las sisternas tienen la fakulta de kontar la valor de la agua, la fuente de la vida para sovrebivir…
Desde la perioda preistorika, las jenerasiones de las mas primitivas a las mas desvelopadas, konstruyeron sisternas ke mostraron la rikeza de las populasiones.
Las de Bodrum son konstruidas de una misma forma. Son simples, nombrozos, por la razon prinsipal ke la peninsula no tiene bastante agua. Las montanyas se guadran la agua para si, ni en este luzyo lugar balneario: La area nomada KARİA, en la antiguidad, inspiro munchos artistos de la pintura a la musika o drama, sovre todo la literatura.
Es enteresante de entevistar kon los Bodrumlis i demandarles una direksion o un adreso De sus aksentos diferentes, responderan en indikando: desde una de las sisternas ke no deshan de la boka...
- Gavaklı Sarnıçtan dönüvercen…
- (Vas a aboltar de la Kavaklı Sisterna), o
- Goca Sarnıç Caddesinden doğru gidcen…
(Vas a ir en derecho de la Kaye de la Grande Sisterna)...
Se konta ke es el Sultan Süleyman ke los izo preparar en 1522, la gerra de Rodes. Siertos tienen las inskripsiones ke mos informan de las personalidades notables (Seyit Ali Kabakçıoğlu, ets.
Aserkando de la puerta de las sisternas, se remarka ventanikas chikas i en el sentro, 8-10 eskalones para pueder alkansar a ver kuando se apoka la agua kontenida. Endispensavles para sovrebivir, oy los barajes alimentan Bodrum.
KE NO MOS MANKE...
