Asigun lo dishe en mi teksto presedente, estamos kontinuando kon los ijos i paryentes, i analizando un poko sus relasyones. No se si puede definir komo “Partikolaridad” el estado de ser padre i madre. Eskoji este byervo, porke yo penso ke todos los djenitores son unikos para sus ijos. Es un estado ke implika fuertes sentimientos de kerensya i tambien de responsabilidad.
Los djenitores son la mas grande rikeza ke poseda todo ijo i ija. Azen todo para asigurarles una vida oroza i todas las posivilidades de engrandesersen kon sanedad fizika i moral. Del punto de vista sosyal, les inkulkan nosyones sovre las relasyones kon los myembros de la famiya, kon el entorno ets.. Perkuran a darles una buena edukasyon i enstruksyon afin de prepararlos a la vida.
Puedemos dizir ke desde su nasimyento la persona pasa por tres importantes etapas: la perioda de kriatureriya, adolesensya i maturidad. Por siguro ke es imposivle te trasar frotyeras definitivas entre kada uns de estas periodas. En la primera, asta 5-6 anyos la kriatura, de toda manera depende de los paryentes. Esto puede kontinuar myentres los anyos de eskola primera afilu. Portanto, es en esta perioda ke empesamos a remarkar las influensas eksterioras, e los edukadores, amigitos de klasa ets…
A poko a poko los medyos de komunikasyon komo la T.V, la prensa, los livros ets... En la adolesensya se ampesa a ver problemas mas o menos importantes, syertos trokamientos sentimental, psikolojikos i fizikos. Asigun mi es la perioda la mas difisil, en lakuala la personalidad o el karakter del adolesente ampesa a afirmarse. Nesesita el kudyo de los paryentes ke deven ser mas pasensyozoz i aserkarsen kon mas muncho entendimyento i tolerensa.
Djustamente, syempre avlamos de la tolerensya, de los sentimientos de los djenitores. Bueno, ke pensan los ijos? Kualo puedemos dizir ? En primero, los chikos, los adolesentes i mansevos selibateryos ke biven kon sus paryentes… Eyos topan muy natural ke el Papa i la Mama esten en kada punto a sus lados, ke kudyen i se okupen de eyos, ke los protejen. Asigun eyos esto es muy natural, es el dover de padres i madres… No es ansi??!...
Pasando los anyos ampesan chikos problemas, insignifiantes (al empesijo!) konfliktos. No les plaze ke los grandes se mesklen a sus manera de vistir, a sus frekuentasyones, a sus amuzamientos ets…En jeneral, estos chikos dezakordos no alkansan a dimensyones de drama. Porke, asigun ya lo estamos vyendo todos, los paryentes akordan a sus ijos una relativa libertad, a kondisyon de kedar en el kuadro de syertas limitas. Lo ke no konosiyamos (o kaji) en muestro tyempo. Es ke me esto yerrando?
Los ijos, ijas kazados ke tienen sus propias famiyas kon sus problemas i responsabilidad, ke pensan eyos? Antes de todo en mi entorno, esto remarkando ke la mayoriya estan lavorando. Tienen un program bastante kargado. Tienen tambien sus amigos, sus entorno, aktividades sosyal, sus lavoro i lo mas importante sus ijos…En muestros diyas, en munchas kazas, seya el ombre, seya la mujer estan lavorando.
Portanto, no puedo enyegar ke malgrado sus okupasyones azen todo el posivle para apartar tyempo a sus paryentes ke mas o menos, son de una syerta edad. En este kuadro puedemos sitar el Rituel de Noche de Shabat, las fyestas relijyozas, selebrasyones de famiya komo bodas, aniversaryos et…A lo menos si no tienen bastante tyempo para versen, ya esta el telefon …Komo uzo syempre, yo ekspozi una jeneralidad. Ma, reelmente, konosko munchos ijos, ijas kazados ke son muy atados a sus paryentes , mizmo si no biven debasho el mizmo techo.
Asta agora, avlimos por los ijos. İ mozotros, paryentes ke tenemos ijos, ijas famiyozos, devemos aserkarmos kon entendimiento a la situasyon ke ekspozi mas arriva i mas ke todo, NO kesharmos. Todos pasimos por este kamino i konosemos muy bien seya los problemas, las difikultades, seya el plazer inkomparavle de ser padre, madre i avuelos tambien.
