“Les juifs sont le thermomètre du degré d’humanité de l’humanité” Goethe (Los djudyos son el termometro ‘del grado de humanidad’ de la humanidad)
La Evropa en su totalidad, i partikolarmente la Fransya estan en peligro de dekadensya, i esto es un sinyo muy desfavoravle para lo ke yamamos “sivilizasyon”. El deskaimyento (en una partida del puevlo) de la manera de bivir, de avlar, de komportarse i partikolarmente de interpretar las leyes sakras de la demokrasia, devyene de dia en dia mas evidente, i ansi se puede konstatar un obskuresimyento de su vizyon de lo ke devra ser el futuro…
Es frekuente de observar un aleshamyento del individuo de todo lo ke mos es imperativamente preskrito por los grandes preseptos ethikos i humanitaryos, loskualos konstituen los pilares de lo ke es djustamente el verdadero adelantamyento… Se ve sovre todo un ‘estado de alma’ negativo ke se reflekta inkonsyentemente sovre los aktos i proyektos de varyas personas; i lo mas grave, un deskaimyento del ombre en su kondisyon de kriansa pensante, responsavle de sus aktos.
Son byen entendido nombrozos los ke, no solo en el payis de Descarte, ma tambyen en varyos otros lugares de la Evropa, luchan kontra estas olas pretas ke destruyen todo sovre sus pasaje; algunos de entre eyos pagan envezes de sus vida en keryendo gerreyar las manos desnudas kontra eyas… otros (despues multiples frakasos) toman la desizyon de partir para topar, en otros puntos del enorme espasyo mundyal, una atmosfera mas adekuada a sus esperansas.
Ansi , se observa en Fransya nombrozas partensyas de djudyos en direksyon del Kanada, de los Estados Unidos i de Israel, lo ke fatalmente konstitue (poko o muncho) un amenguamyento relativo del potensyal intelektual i syentifiko del payis en el kual eyos bivian.
El byen konosido eskritor franses de orijen djudia ‘Marek Halter’ eskrivyo a este sujeto un artikolo entitolado “Amis et frere juifs, ne quittez pas la France, ce n’est pas une solution.” (Amigos i ermanos djudyos, no abandonesh la Fransya, no es una solusyon.) artikolo del kual publikamos en esta mizma pajina la traduksyon integral en djudeo-espanyol.
En efekto “fuir de Fransya no es una solusyon”. Este payis fue uno de los primeros ke dyo a los djudyo sus kualidad de verdaderos sitizanos kon la totalidad de sus derechos i byen entendido de sus doveres… Es la Fransya ke desde mas de mil anyos aksepto sovre sus tyerras este puevlo errante ke era el muestro, estas personas de fey ansi ke de uzos diferentes de los suyos, ke eran muestros avuelos.
Por seguro ke en el korso de la Historya uvo puntos obskuros en este payis: desdenyo, menospresyo i mizmo arrondjo de parte de algunos de sus dirijentes, ma kaji syempre eyos fueron korrijidos… Uvo el inyovle antisemitizmo de la fin del dyez i mueven siglo en una parte de la klasa intelektual, i tambyen el kavzo Dreyfus, ma poko despues uvo la bravura de uno de los militaryos ke lo avian kondenado, de konfesar el yero del primer djuzgamyento i de egzijir el restablesimyento de la Verdad... Uvo sovre todo el sublime ‘J’accuse” de Emile Zola.
De mezmo, en la Segunda Gerra mundyal, uvo el sinistre Governo de Vichy, ma tambyen, komo lo dize Marek Halter, la multitud de sitizanos fransezes ke (al risko de sus propya vida) eskondyeron i salvaron munchos de muestros ermanos…Mas tadre, despues la fin de la Guerra, es la Fransya ke ovro lo mas en 1948 para aparejar la ‘Deklarasyon de los Derechos del Ombre’ i ke konfio la redaksyon del teksto a un djudyo “René Cassin”.
Si, puede ser, komo mo lo aze sentir Marek Halter en su artikolo, “Partir de Fransya en este momento de grande difikultad, para ir en Espanya, Kanada o byen otros lugares” puede tener mas o menos un sonido de abandono.
Por kontra segun mi modesta opinyon, ‘Bushkar refujyo en İsrael, payis el mizmo entornado de potensyas enemigas, kada una kon su kontenjente de djihadizmo’ es una desizyon totalmente diferente … İr en Israel es un retorno a muestras raizes, es bushkar ayudo en el solo lugar del mundo ande nunka kualkyer persona tendra el derecho de arrondjarmos… İr en Israel es tambyen kaji un dover.
En el korso de una entrevista kon el muevo Gran Rabbino de Fransya ‘Rav Haim Korsia’, una djornalista resivyo la repuesta sigyente konsernando estas partensyas de vez en vez mas frekuentes en direksyon de Israel: “Partir parce qu’on n’est pas heureux en France, c’est non seulement un échec pour la France mais aussi un échec personnel pour soi et pour le judaïsme. Les “aliyah” [retour en Terre sainte] réussies sont celles qui viennent d’un choix construit, pas celles qui se fondent sur une amertume envers la France, parce qu’elle ne serait plus la même. Bien sûr, quand elle se referme sur elle-même, ce n’est plus la France dont on rêve tous. Mais je reste persuadé que la France a en elle une extraordinaire capacité d’accueil, d’ouverture et de générosité qu’il faut simplement encourager.” (En este momente Partir porke la persona no se syente feliz en Fransya’ es no solo una desfecha para la Fransya, ma tambyen una desfecha para si mizmo i para el djudaizmo. Las ‘aliyah’ reushidas son las ke repozan sovre una desizyon byen konstruida i no las ke tyenen komo baza un sentimyento de amargura.
Byen entendido kuando eya se enserra sovre eya mizma, la Fransya no es mas el payis de muestro ideal, ma personalmente yo esto konvensido ke este payis tyene en el mizmo una ekstraordinarya kapasidad de avyertura, de resivo i de djenerozidad ke syempre devemos enkorajar.”
Para mozotros, simples mortales enfohados en una perpetual bushkida de la Verdad, una de las kozas ke demandamos de los Syelos es ‘ke el Dyo Baruhu arranke el mundo del obskurantizmo i lo kite a luz’ Amen.
