Traduksyon en djudeo-espanyol de un artikolo de Marek Halter publikado en su propya lingua en el diaryo fransez ‘Le Monde’
Ermanos mios, me ambezi ke munchos de entre vozotros keren partir de Fransya, los unos para Israel, otros para el Kanada i otros (los sefaradim) en Espanya, payis delkual el Governo prometyo la nasyonalidad espanyola a los desendyentes de los djudyos ekspulzados de parte de los Reyes katolikos en 1492.
La razon de esta partensya masiva, la konosko: ‘el anti-djudaizmo’. Es verdad kel anti – djudaizmo en Fransya es oy virulente, mas de kinyentas keshas fueron formuladas desde el prisipyo del anyo.
De una parte ‘los mansevos fransezes dezesperados ke kedaron sin lavoro’ responden a la yamada del partido ultranasyonalisto i konsideran los djudyos komo estranjeros ke komen sus pan...De otra parte ‘aglomerasyones de fransezes de orijen Muzulmano’ afirman ke los djudyos son sionistos kontra los kualos kale azer la gerra.
Estash bivyendo dia despues de dia, momentos diffisiles, vos espantash de salir a la kaye, de mandar vuestros ninyos a la eskola ... vuestras botikas, vuestras kazas son envezes desgradadas, vuestros otomobiles kemados, vuestros Betahaimes profanados.
Vuestra situasyon prova (mijor ke kualkyer tezis de sosyolojia) el estado prezente de la Sosyedad franseza. Goethe, el grande eskritor Alman dizia ke ‘los djudyos son el termometro ke marka ‘el grado de humanidad’ de la Humanidad’, ma muestros analistos se olvidan de konsultarlo.
Ansi, munchos de entre vozotros komparan la situasyon aktual a la de los anyos 1930. Yo personalmente no lo kreo. En akeya epoka eran los Estados ke avian faltado i ke abokavan la kavesa delantre chikos grupos minoritaryos.
Richard von Weizsäcker, Prezidente Federal de la Almanya entre 1984 a 1994 dizia kon razon ke no eran los fashistos ke avian undido la Republika de Weimar ma la mankansa de verdadera demokrasia.
Oy en la Evropa, mizmo si los partidos ekstremistos estan progresando, las demokrasias eyas estan rezistyendo. Vos akodrash por seguro la reaksyon de Manuel Valls (entonses ministro de las kestyones interyores) a las agresyones anti-djudaikas de Dieudonné i de sus kompanyeros.
Fuir de Fransya no es una solusyon. El anti-djudaizmo komo tambyen los otros djeneros de rasizmo son ‘un mal universal’, una epidemia.
Muestros avuelos bivian en Narbonne en 722. Es aya ke unos kuantos anyos mas tadre, un djudyo “Yehudai Habibaï ben Natronaï” devino Rey de un chiko estado rekonosido por Charlemagne el mizmo.
Ay 16 siglos ke los djudyos ayegaron a Paris. La sinagoga de la kuala mos avla Grégoire de Tours se topava serka de Notre Dame. La korte de la Djuderia, el baryo djudyo (antes sus ekspulsyon i la konfiskasyon de todos sus byenes por Philippe Auguste en 1182) okupava el espasyo del aktual Opera. En la epoka medyeval ‘la kaleja de la Arpa’ se yamava ‘la kaleja de la Arpa djudia’ i durante el reynado de Saint Louis, el afamado Rabbi Yehiel de Paris avia fraguado su Yeshiva.
Enfin eske savesh, vozotros mis amigos i mis ermanos, ke sovre la facha de la mas prestijyoza katedral de Fransya i puede ser mizmo del mundo “Notre Dame de Paris” figuran 28 estatuas al imajen de los 28 Reyes de İsrael? Es ke savesh kel ermozo teksto de la deklarasyon de los Derechos del Ombre de 1789 fue inskrito por los revolusyonaryos en las tabelas de la ley?
El 27 Septembre 1781 los djudyos fueron finalmente emansipados grasyas a la Revolusyon. İ mizmo en las anyadas obskuras de la okupasyon (durante la segında gerra mundyal) kuando la milisya franseza ayudava los nazis a apanyar djudyos, los dos tyersos de la komunidad (djudia) fueron salvados de parte de los ke oy yamamos ‘los djustos’ al presyo envezes de sus propya vida.
İ, vozotros keresh abandonar este payis? Keresh abokar kavesa delantre los ke mos aboresen, delantre los ke keren djustamente muestra partensya? Es ke vash a deshar esta kaza ke es la muestra a los djihadistos i al FN?
Un dia demandi al Gran Rabbino de Frankfort Nathan Levinson (el mizmo de orijen alman) ke entro de egzilyo kon el uniforma Amerikano: deke el kedava en Almanya? Su repuesta fue:“Para privar Hitler de esta ultima viktorya: ‘Una Almanya judenrein (una Almanya sin djudyos)
