Desde mas de tres semanas fueron dias tristes, muy tristes i tambyen muy difisiles a bivir para el puevlo İsraelyano i igualmente para el djudaizmo de la diaspora... Para kada uno de entre mozotros, ande ke mos topemos, serka o leshos del lugar ande se produzyo el drama de los tres estudyantes kapturados, fue la mizma dolor i la mizma revolta kontra el enemigo inhumano, komo tambyen kontra este destino implakavle del puevlo djudyo de syempre ser entornado de odyo, amenasas i akoso.
Martes de la semana pasada uvo el terrivle anunsyo de la deskuvyerte (despues de mas de 15 dias de bushkida) de los puerpos sin vida de los tres adolesentes djudyos matados salvajemente por terroristos, loskualos les dyeron la muerte al nombre de sus Livro Santo... Fue un krimen horrivle, un akto infame ke obskuresyo ainda mas la atmosfera del Oriente Medyano.
Si, el mizmo Martes de la semana pasada, fue en el korason de kada djudyo una sufriensa ke ninguna palavra puedra ekspresar, echa de un terrivle sentimyento de indjustisya. I entonses sovre las Tyerras Santas de Israel, uvo kapos de partidos ekstremistos ke inkonsyentemente, sin realizar el perikolo ke esto komportava, despertaron en el korason de unos kuantos de sus adeptos el kriminal sentimyento de kerer personalmente ripostar.
Ansi, miles i miles de relijyozos kaminaron en las kayes de İsrael gritando todos de una mizma boka “Vengansa...Vengansa”.
Myerkoles, fue la segunda novedad no manko terrivle ni manko doloroza ke la del dia presedente, myerkoles fue el anunsyo de la muerte de un adolesente palestinyano de 17 anyos Mohammad Abou Khdeir, kemado i karbonizado de parte de djudyos ke kijeron tomar vengansa de la muerte de los tres martiryos djudyos.
Personalmente me es imposivle de pensar ke un djudyo i partikularmente un djudyo relijyozo ‘pudo matar de sangre fria un inosente’ en el solo buto de tomar vengansa. Akto obsurdo i kriminal, akto ineksplikavle kuando se save ke uno de los primeros komandamyentos del Dekalogo mos dize “No mataras”.
‘Matar un inosente, kemarlo para vengar otras viktimas’ no es azer djustisya, ma simplemente perpetrar un muevo asasinato.
El governador de Yerushalayim Nir Barkat kondeno immedyatamente i publikamente el drama de Mohammad Abou Khdeir… Benyamin Netanyahu tambyen izo lo mizmo i demando al puevlo Israelyano de no ir kontra la ley judisyal, lo ke puedra krear una situasyon de terrivle konfuzyon i de mas grande indjustisya.
Konsyentes de la verasidad de estos argumentos, myerkoles verso la tadre, mas de mil djudyos İsraelyanos manifestaron kontra los aktos anti- palestinyanos, repetando kontinualmente esta vez: ‘Un djudyo no se venga’. En efekto un djudyo no se venga, el bushka la djustisya no la vengansa, i esto es uno de los artikolos los mas fuertes de su kodigo de moralidad.
El esprito de vengasa dirijido syegamente sovre kualker viktima del kampo enemigo no responde a los verdaderos kriteryos de lo ke es el esprito de djustisya : ‘Ninguno pagara por el otro, ni el padre por el ijo, ni el ijo por el padre’ mos dizen los profetas en la Biblia.
La famiya de Naftali Frankel (uno de los tres adolesentes Israelyanos kapturados i matados en Sisjordania) kondeno tambyen, eya mizma, el rapto i el asasinato myerkoles de la viktima ‘Mohammad Abou Khdeir’.
Segun lo ke meldi en la Prensa: “Desde el 30 del mes de Junyo en las reunyones del ‘Kabineto de Seguridad’ el Primer Ministro Binyamin Netanyahu se komporta kon muncha moderasyon. El refuzo de akseptar las demandas de los ekstremistos del Governo, tal el Ministro de la Industria Naftali Bennett ke propozo una operasyon militarya por tyerra de grande dimensyon en la banda de Gaza afin de destruir el Hamas i su infrastruktura.
Propozisyon a la kuala el Ministro de la Defensa Moshe Yaalon tambyen se opozo, deklarando ke “la Armada Israelyana no dezea reproduzir los yerros de la ofensiva de Desembre 2008 nombrada ‘Plomo enduresido’ ke avia provokado una luvya de roketas sovre Israel i ansi el renforsamyento del Hamas.
Lunes 7 julyo 2014: Segun las gazetas İsraelyanas ‘Aharanot’ i ‘Haaretz’ 3 (tres) ekstremistos djudyos entre los 6 ke fueron sospechados despues la deskuvyerta del puerpo karbonizado de Mohammad Abou Khdeir, konfesaron sus partisipasyon al akto kriminal. Eyos seran djuzgados debasho las akuzasyones sigyentes: “apartenensya a una organizasyon terrorista”, “kaptura de la viktima kon intisyon de perpetrar un krimen”, “asasinato de un minor”, “posesyon de armas i minusyones” i “matansina ke tyene un karakter rasisto”.
De otra parte, el Primer Ministro Benyamin Netanyahu telefono personalmente al padre de Mohammad Abou Khdeir para prezentarle sus kondolensas i ekspresar su indinyasyon.
Martes de manyana: Segun lo ke mos ambeza el diaryo elektroniko ‘Le Monde’: “por mediasyon del Servisyo de informasyon Ejipsyano, el Hamas empeso negosyasyones para un muevo akordo de ‘sesar el fuego’(ateş kes) kon İsrael, en el objetivo de luchar kontra la tensyon ke en este momento egziste entre eyos dos.
